Jusan Bank Kcell ұялы байланыс операторындағы үлесін азайтты. Бұл туралы Қазақстан қор биржасында жарияланған акционерлер тізімі жайлы құжаттан көруге болады.
Jusan Bank 42,56 мың акция сатқан. Бұл сауда Kcell компаниясының Jusan Bank-пен бірлескен финтех-қызметі OGO жобасын жабу туралы хабарламасы аясында жүзеге асты.
KASE мәліметіне сәйкес, Jusan Bank иелігіндегі Kcell акцияларының саны 18,13 миллионға дейін төмендеді. Егер бұл акциялар нарықтық бағамен сатылған болса, олардың жалпы құны 140,9–148,5 млн теңге аралығында болуы мүмкін. Бұл сома акциялардың 2025 жылғы 1 қаңтар мен 1 сәуір аралығындағы құнына негізделіп есептелген.
Бір акцияның бағасы сол кезеңде 3 310,01–3 490,67 теңге аралығында болған. Нәтижесінде, Jusan Bank-тің Kcell-дегі жалпы үлесі небәрі 0,02 пайыздық тармаққа төмендеп, 9,06%-ды құрады.
Jusan Bank-пен қатар, мобильді оператордың акцияларын Бірыңғай жинақтаушы зейнетақы қоры (БЖЗҚ) да сатқан. Қордың үлесі 7,06%-ға дейін азайды. Бұл шамамен 91,36 мың акцияға тең немесе олардың жалпы санының 0,04%-ы. Jusan Bank сияқты есептеу әдісімен бұл акциялардың жалпы құны 302,4–318,9 млн теңге аралығында болған.
Осы жылы сәуірде Kcell өз клиенттеріне Jusan Bank-пен бірлескен OGO жобасының жабылатыны туралы хабарлаған. Бұл қосымшада клиенттер OGO цифрлық картасын ашуға, депозит пен несие рәсімдеуге, мобильді теңгерім арқылы шотты толықтыруға және қолма-қол емес төлемдер үшін бонустар алуға мүмкіндік алған еді.
Былтырғы есеп бойынша, Kcell байланыс операторының таза пайдасы үш есе азайып кеткен. 2023 жылы 32,9 млрд теңге таза пайдамен салыстырғанда, былтырғы көрсеткіш 10,2 млрд теңгені құрады.
2025 жылдың 1 қаңтарындағы жағдай бойынша компанияның 51% акциясы – «Қазақтелеком» АҚ-ға, 14,87% – KC Holding Ltd компаниясына тиесілі. Қалған үлестер First Heartland Jusan Bank (9,08%), БЖЗҰ (7,1%) және басқа миноритарлы акционерлер арасында бөлінген.
