Қонаев қаласындағы атыс: бір топ адам кек алу мақсатында кісі өлтірген
Қонаев қаласында Алматы облысының қылмыстық істер жөніндегі мамандандырылған ауданаралық соты кісі өлтіру ісі бойынша үкім шығарды. Екі адам 19 жылға, төрт адам 17 жылға сотталды. Бұл туралы Алматы облысының соттары хабарлады.
Екі адам жабылған
Оқиға 2024 жылғы маусым айында Қонаев қаласындағы «Алекс» демалыс орнында болған.
Сотта анықталғандай, сол жерде екі сотталушы мен жәбірленуші «М» жанжалдасып қалып, арты төбелеске ұласқан.
«Жәбірленуші басым түсіп, осыдан кейін сотталушыларда оны өлтіру ниеті пайда болған. Олар қылмыстық ойларын жүзеге асыру үшін тағы төрт адамды тартқан», – деп хабарлады Алматы облысының соттары.
Мәліметке қарағанда, сол күні кешке Қонаев көшесіндегі Халыққа қызмет көрсету орталығы маңында олар жәбірленуші «М»-ге бірнеше рет оқ атқан. Жәбірленуші ауруханаға барар жолда көз жұмды. Оның досы «Б» жарақаттанып, дер кезінде көрсетілген медициналық көмектің арқасында аман қалды.
Қонаев соты үкім шығарды
Сот алты сотталушыны кінәлі деп тауып, «А», «А», «Б», «А», «Т» және «Н»-ға «қасақана адам өлтіру және адам өлтіруге оқталу» бабының екі тармақшасы бойынша үкім шығарды.
«А» және «Т» есімді сотталушыларға 19 жыл, ал «А», «Б», «А», «Н» сотталушыларына 17 жылдан бас бостандығынан айыру жазасы тағайындалды. Сотталушы «Б» 2,5 жылға бас бостандығын шектеуге үкім шығарылды».
Жаза тағайындау кезінде айыпталушылардың бұрын сотты болмағанын және кәмелетке толмаған балалары барын жеңілдететін, ал атыс қаруын қолдануын ауырлататын мән-жай ретінде ескерді.
Естеріңізге сала кетейік, 2024 жылғы қазанда Алматы облысының Талғар қаласында жасөспірім Шерзат Полат кісі қолынан қаза тапты. Қылмыстық істі Алматы облысының полициясы тергеп, биыл ақпанда сотқа өткізді. Шерзат ісі Талдықорған қаласындағы сотта қаралып жатыр. Іс материалдары 62 томнан тұрады. Тоғыз адамға айып тағылды. Прокурорлар Шынасылға «адам өлтіру және бұзақылық», Сакиевке «адам өлтіруге оқталу және бұзақылық» айыптарын тақты. Қалған алтауы – Белғожаев, Әскентай, ағайынды Тоқтаубаевтар, Ілиясов және Қалиахмет — «бұзақылық» үшін істі болды. Ал Думан Ысқаққа «ауыр қылмыс туралы хабарламау» айыбы тағылды.
