Каспий Құбыры Консорциумына тиесілі (КҚК) «Кропоткинская» мұнай айдау станциясы 20 мамырдан кейін толығымен іске қосылады. КҚК директоры Николай Горбань осылай айтты деп жазады мұнай-газ сарапшысы Олег Червинский өзінің телеграм-арнасында.
Горбаньның сөзінше, қазір негізгі құрылыс-монтаж жұмыстары аяқталған.
«20 мамырда бізде жоспарлы үзіліс болады. Содан кейін станция толық көлемде жұмысын бастайды», – деді ол.
Станцияны қалпына келтіру кезінде негізінен ресейлік құрылғылар мен материалдар пайдаланылған екен.
Еске сала кетейік, КҚК-ға тиесілі «Кропоткинская» мұнай айдау станциясына 17 ақпанда бірнеше дрон шабуылдаған еді. Консорциумның акционерінің бірі, «Транснефть» компаниясы, жөндеу жұмыстарына байланысты Қазақстаннан КҚК арқылы мұнай айдау көлемі шамамен 30%-ға азайғанын хабарлады. Шығынның орнын толтыру үшін екі ай қажет болады деген.
«Кропоткинская» станциясы қазақстандық мұнай экспорты үшін өте маңызды, ол арқылы елден тасымалданатын мұнайдың 80%-ы өтеді.
