3-4 мамыр күндері Алматы қаласының төрт ауданында ірі ауыл шаруашылығы жәрмеңкесі өтеді. Жәрмеңкеге Алматы мен Алматы облысынан келген 318 фермер мен ауыл шаруашылығы өндірушілері қатысады. Қала тұрғындарына 900 тоннаға дейін азық-түлік өнімдерін ұсынуды жоспарлап отыр.
Сатылатын өнімдердің ішінде:
- 400 тонна көкөністер мен жемістер (картоп, сәбіз, пияз, қырыққабат, қызылша, қияр, қызанақ, алма, шалғам, сарымсақ);
- 390 тонна ет (сиыр, қой, жылқы, шошқа, тауық еті);
- 50 тонна сүт өнімдері (сүт, айран, қаймақ, сүзбе, май, ірімшік);
- 30 тонна өзге азық-түліктер (қант, тұз, күріш, қарақұмық, ұн, макарон);
- 30 тонна жұмыртқа, шұжық және бал ұсынылады.
Жәрмеңке 3 және 4 мамырда, сағат 09:00-ден 18:00-ге дейін келесі орындарда өтеді:
- Алмалы ауданы – Масанчи көшесі (Әйтеке би мен Гоголь көшелерінің арасында),
- Әуезов ауданы – Өтеген батыр көшесі (Абай даңғылынан төмен),
- Бостандық ауданы – Қазақфильм ықшамауданы (әл-Фараби даңғылынан жоғары),
- Медеу ауданы – Меңдіқұлов бульвары мен Бектұров көшесінің қиылысы.
Ұйымдастырушылардың мәліметінше, апта сайын мұндай жәрмеңкелерге 45 мыңнан астам қала тұрғыны мен қонағы қатысады. Сөрелерде 1000-нан астам азық-түлік түрі ұсынылады.
Жәрмеңкені ұйымдастырып отырған — «Алматы» әлеуметтік-кәсіпкерлік корпорациясы. Бағаны тұрақтандыру мақсатында әлеуметтік маңызы бар азық-түлік өнімдері нарықтық бағадан 15–20%-ға арзан сатылады.
