Сәуір айында биржадан тыс қанша доллар сатылды
2025 жылғы сәуір айында Қазақстанның биржадан тыс валюта нарығында белсенділік артты. АҚШ доллары мен ресей рублі бойынша мәмілелер көлемі наурызбен салыстырғанда едәуір өссе, ал теңге негізгі валюталарға қатысты біршама әлсіреген. Бұл туралы Ұлттық банктің биржадан тыс операцияларға қатысты статистикасында жазылған.
АҚШ долларына сұраныс артты, теңге бағамы әлсіреді
Сәуір айында банктердің валюта сату-сатып алу операциялары 28%-ға өсті. Егер наурызда банктер мен қаржы ұйымдары 7,1 млрд доллар сатып алса, сәуірде бұл көрсеткіш 9,1 млрд долларға жетті. Сатылған доллар көлемі де 10,4 млрд долларға дейін өсті (наурызда – 7,5 млрд). Соның ішінде резидент емес банктер 7,9 млрд доллар сатты (наурызда – 5,3 млрд).
Бағам да өзгерді – сатып алу бағамы 499,85 теңгеден 518,00 теңгеге дейін көтерілген. Яғни теңге шамамен 3,6%-ға әлсіреді.
Еуро мен рубль нарығында да қозғалыс байқалды
Еуро бойынша мәмілелер көлемі күрт артты. Наурызда небәрі 2,7 млн еуро сатып алынса, сәуірде бұл көрсеткіш 1,05 млрд еуроға жеткен. Бағам да өсті: 540,01 теңгеден 587,64 теңгеге дейін көтерілді. Бұл теңгенің еуроға қатысты 8,8%-ға әлсірегенін білдіреді.
Ресей рублімен операциялар да айтарлықтай көбейді: наурызда 35,2 млрд рубль сатып алынса, сәуірде бұл көрсеткіш 40,4 млрд рубльге жетті. Сатылым көлемі де 24,2 млрд рубльді құрады (наурызда – 20,7 млрд). Алайда, рубльдің бағамы аса өзгермеді – 5,82 теңгеден 6,13 теңгеге дейін өскен.
Қытай юані (CNY) бойынша операциялар аз көлемде ғана жүргізілді. Наурызда 0,1 млн юань сатып алынса, сәуірде бұл көрсеткіш 0,3 млн болды. Бағам төмендеп, 73,47 теңгеден 70,30 теңгеге дейін түсті, яғни теңге күшейді.
Ағылшын фунты (GBP) нарығында сәуір айында алғаш рет қозғалыс байқалды: 0,1 млн фунт көлемінде мәміле тіркелді. Бұл – жаңа ойыншылардың немесе бағыттардың пайда болғанын білдіруі мүмкін. Фунттың орташа бағамы – 680,73 теңге.
