Қатар королінің отбасы Трампқа «ұшатын сарай» сыйға тартпақ

Қатар королінің отбасы Дональд Трампқа «ұшатын сарай» – суперлюкс Boeing 747-8 ұшағын сыйға тартпақ. Оның құны – 400 миллион доллар.

ABC News телеарнасының хабарлауынша, АҚШ президентінің әкімшілігі бұл ұшақты қабылдауға дайындалып жатыр. Бұл – АҚШ-қа шетел үкіметі сыйлаған ең қымбат сыйлық.

Дональд Трамп бұл ұшақты өзінің жаңа Air Force One борты ретінде президенттік қызметін атқарып жүрген кезеңде пайдалануы ықтимал. Кейінірек ұшақ Трамптың президенттік кітапханасына тиесілі қордың иелігіне өтпек.

Қатар королінің отбасы тартуы АҚШ президентіне ұнағаны байқалады.

Телеарна мәліметінше, бұл сыйлық туралы келесі аптада ресми түрде жариялануы мүмкін. Сол кезде Ақ үй басшысы екінші мерзімінің алғашқы шетелдік сапары аясында Қатарға барады деп күтіліп отыр. Айта кетейік, Дональд Трамп бұл ұшақты ақпан айында Уэст-Палм-Бич әуежайына қонғанда көріп шыққан.

Алдымен ұшақ АҚШ Әскери-әуе күштеріне беріледі. Олар оны Қарулы күштер талаптарына сай етіп қайта жабдықтайды. Бұл талаптар – мемлекет басшысын тасымалдайтын кез келген ұшаққа қойылатын міндет.

Авиация саласы сарапшыларының бағалауынша, ұшақтың құны – шамамен 400 миллион доллар.

Мұның алдында АҚШ пен Ұлыбритания баж салығы бойынша келісімге келген болатын.