Болат Өтемұратовқа тиесілі банк табысын арттырды
Қазақстандағы ең бай адамдардың жетілігіне кіретін Болат Өтемұратовқа тиесілі банк табысын арттырды. 2025 жылдың үш айында ForteBank 45,9 млрд теңге таза пайда тапты. Қаржы ұйымының есебі Қазақстан қор биржасында жарияланған.
Бұл – өткен жылдың осы кезеңімен салыстырғанда 33%-ға артық көрсеткіш. Қаржы институтының жаңа есебінде активтері өсіп, нарықтағы позициясы тұрақты екені атап көрсетілген.
Банк таза пайыздық кірісін 71,8 млрд теңгеге дейін жеткізген. Өсім 23%-ды құрайды. Мұндай нәтиже несие портфелі мен инвестициялық бағалы қағаздардан түскен кірістің көбеюіне байланысты.
Сондай-ақ валюта нарығындағы жоғары құбылмалылық банкке тиімді болды: шетел валютасымен операциялардан түскен кіріс екі есеге өсіп, 14,6 млрд теңгеге жетті. Комиссиялық табыс 4,5 млрд теңге шамасында сақталып отыр.
31 наурыздағы жағдай бойынша банктің жалпы активтері 4,48 трлн теңгеге жетті. Бұл көрсеткіш бір тоқсан ішінде 9,5%-ға өскен. ForteBank-тің кредиттік портфелі де қарқынды түрде ұлғайып, 2,11 трлн теңгені құрады — бұл бір жылдағы 15,9% өсім.
Клиенттердің депозиттері мен ағымдағы шоттарындағы қаражат көлемі 2,95 трлн теңгеге жеткен. Бұл банк үшін сенімді өтімділіктің көрсеткіші саналады. Банктің жалпы капиталы 546 млрд теңгені құрайды.
Банктің 90,91% акциясы – Болат Өтемұратовқа тиесілі. Ақпанда ForteBank Astana International Exchange (AIX) алаңында 400 миллион долларды құрайтын бес жылдық еврооблигацияларын орналастырды.
