Министр мектеп бітіру кештерін атойлап өткізуге неге қарсы екенін түсіндірді

Үкімет сағатынан кейін журналистер Оқу-ағарту министрі Ғани Бейсембаевтан «балабақша мен мектептегі іс-шараларға жеке өзіңіз ақша жинайсыз ба» деп сұрады.

Министр жастау кезінде бұл сұраққа оң жауап беруі мүмкін екенін атап өтіп, қазір бұған қарсы екенін жеткізді.

«Қазір, уақыт өте келе, мектеп бітіру кештеріне кортеждер жалданып, жол ережелері бұзылып, қолайсыздық туғызып, кейде балаларымыз қайғылы жағдайларға тап болып жатқандарын көріп, балалардың өмірі мен қауіпсіздігіне қауіп төндіретін ауқымды іс-шараларға толық тыйым салу туралы шешім қабылданды», – деді ол.

Бейсембаев министрлік мектеп бітіру кештерін шектен тыс тойлауды құптамайтынын мәлім етті. Оның сөзінше, бұл балалар үшін емес, ересектер үшін керек нәрсе.

«Мерекені қарапайым, даңғазасыз өткізуге болады. Егер ата-ана белгілі бір соманы төлей алмаса, бала өзін жайсыз сезінбейді. Бұл жерде жауапкершілік тек мектептің ғана емес, ата-ананың да мойнында», – деген ол жеке өзі мектептегі той-думаннан бас тартқанын айтты.

Айта кетейік, министр Үкімет сағатынан кейінгі баспасөз мәслихатында, мектептегі сынып жетекшілерге үстемеақы қосу жайы не болып жатқаны төңірегінде пікір білдірген.

Сондай-ақ ол баспасөз жиынында мұғалімдерді ақылы семинарға тарту тоқтамай тұрғанына қатысты пікір білдірген.