Дрондар шабуыл жасаған мұнай станциясы қайта іске қосылды
2025 жылғы 23 мамырда Каспий құбыр консорциумы Ресейдің Краснодар өлкесінде орналасқан «Кропоткинская» мұнай айдау станциясын қайта іске қосты. Бұл станция 17 ақпанда дрон шабуылынан кейін уақытша тоқтап қалған болатын. Шабуыл кезінде жарылғыш заттар мен металл сынықтары бар дрондар нысанға соғылып, станция қатты зақымданған.
«Каспий құбыр консорциумы» баспасөз қызметінің хабарлауынша, жөндеу жұмыстары кезінде трансформатор, генератор, кабельдер мен басқару құрылғылары қалпына келтірілді.
Станцияның Қазақстан үшін маңызы қандай
«Кропоткинская» станциясы – Қазақстан мұнайын Қара теңіздегі Новороссийск портына жеткізетін үлкен құбыр жолының бір бөлігі. Бұл құбыр арқылы еліміз өз мұнайының 80 пайыздан астамын шетелге экспорттайды.
Дрон шабуылынан кейін мұнай айдау көлемі 30 пайызға қысқарған. Бірақ Қазақстан Энергетика министрлігі Каспий құбыр консорциумы біздің мұнайға ешқандай шектеу қоймағанын мәлімдеген. Мұнай қабылдау бұрынғы кесте бойынша жүріп жатты.
Шабуылға кім жауапты?
Ресей тарабы бұл шабуылды украин дрондарынан болды деп есептейді. Осы оқиға бойынша Ресей тергеу комитеті терроризм бабы бойынша қылмыстық іс қозғады. Қазақстанның Сыртқы істер министрлігі бұл жағдайды Украинамен дипломатиялық жолмен талқылайтынын мәлімдеді.
Каспий құбыр консорциумы – Қазақстан мен Ресей мұнайын Қара теңізге жеткізетін негізгі жол. Құбырдың ұзындығы – 1 511 шақырым. Оның иелері арасында Қазақстанның «ҚазМұнайГаз» компаниясы (19%), Ресейдің «Транснефть» (24%) және шетелдік Chevron, ExxonMobil, Eni сияқты ірі компаниялар бар.
