«Келешек» бағдарламасы: 5 жастағы балаға 235 920 теңге қайтарымсыз ақша беріледі

«Келешек» бағдарламасы бойынша алғашқы төлемдер 2025 жылғы 31 тамызға дейін түседі. Бұл туралы Отбасы банкінен хабарлады.

Білім беру капиталы ретінде берілетін төлем 235 920 теңгеден басталады. Ол осы жылдың бірінші жартысында 5 жасқа толған немесе толатын балалардың атына аударылады.

Мемлекеттік қолдауға ие болу үшін ата-аналар Отбасы банкінде AQYL білім беру жинақ депозитін ашуы керек. Қазір осындай депозитті 6 624 ата-ана ашып үлгерген.

AQYL депозитін ашудың 5 тәсілі:

1. Баспана маркет порталы арқылы: otbasybank.kz сайтына кіріп, жеке кабинет → «Менің банкім» → «Депозиттер» → «Жаңа депозит ашу» батырмасын басып, AQYL таңдау.
2. Отбасы банк мобильді қосымшасы арқылы: қосымшада «Менің банкім» → «Жаңа депозит ашу» → AQYL таңдаңыз.
3. Банк бөлімшелерінде.
4. Консультанттар арқылы: өз қалаңыздағы кеңесшіні осы сілтеме арқылы таңдауға болады — https://hcsbk.kz/ru/network-agents/.
5. Банк сайтындағы бейнеқоңырау арқылы — hcsbk.kz.

AQYL депозиті бар ата-аналар не істеуі керек?

Егер сізде AQYL депозиті бұрыннан бар болса және балаңыз 2025 жылдың бірінші жартысында 5 жасқа толатын болса, 2025 жылдың 15 мамыры мен 30 маусымы аралығында Баспана маркет порталындағы жеке кабинетіңізде депозитке қосымша келісімге қол қоюыңыз қажет.