Павлодарда мүгедектігі бар әйел туысына «сатқан» пәтерін сот арқылы қайтарып алды

Павлодарда мүгедектігі бар әйел туысымен пәтер үшін соттасып, тек Жоғарғы сотта жеңіп шықты. Іс материалдарына сәйкес, пәтерге байланысты дау 2022 жылы қол қойылған сатып алу-сату шарты негізінде туған.

Ол жерде ер адам туысынан екі бөлмелі пәтер сатып алған. Ал пәтерді «сатқан» әйел 2017 жылдан жалпы ауруға байланысты екінші топтағы мүгедектігі бар, 2001 жылдан психиатр есебінде тұрған.

Мәміле жасалғаннан кейін әйел бұл пәтерді 6 айға жалға алған. Жалдау мерзімі аяқталғаннан кейін сатып алушы оған пәтерді босату қажет екенін хабарлаған, бірақ ол үш адамнан тұратын отбасымен сонда тұруды жалғастырған. Оларды шығару үшін сатып алушы пәтердің иесі екенін көрсетіп, сотқа жүгінген.

Әйел де бұған келіспей, сатып алу-сату шартын жарамсыз деп тану туралы қарсы талап қоюды сұрап сотқа жүгінген.

«Ол ауруына байланысты өз іс-әрекетінің мәнін түсінбей, жиенінің өтініші бойынша шартқа қол қойғанын, іс жүзінде пәтерді сату ниеті болмағанын түсіндірген. Оның айтуынша, шарт үшінші тұлғаның арасындағы қарызды жабу үшін жасалған», – деп хабарлады Жоғарғы сот.

Бірінші және апелляциялық сатыдағы соттар оның талабын орындаудан бас тартқан. Сот шешім шығару барысында әйелге жүргізілген сот-психиатриялық сараптама оның әрекетке қабілетсіздігін растамағанына сүйенген. Осылайша әйелді пәтерінен шығарған.

Содан кейін ол Жоғарғы сотқа жүгінді. Сот алқасы мүлікке меншік және пайдалану құқығы бұрынғы меншік иесіне тиесілі деп танып, мәміле жарамсыз деген қорытындыға келді. Іс бойынша бұрын шығарылған сот актілерінің күшін жойылды, әйел өз пәтерінде қалатын болды.

Айта кетейік, бұған дейін Жоғарғы сот психотроптық зат сақтағаны үшін сотталған азаматты қамаудан босатты.