KASE «Қазақтелекомның» артықшылығы бар акцияларымен сауда-саттықты уақытша тоқтатты
2025 жылдың 26 мамырында Қазақстан қор биржасы (KASE) «Қазақтелеком» АҚ-ның артықшылығы бар акцияларымен жүргізіліп жатқан сауданы уақытша тоқтатты. Бұған акция бағасының 52,71%-ға төмендеуі себеп болған.
Неліктен сауда тоқтатылды?
KASE ішкі ережелеріне сәйкес, егер «премиум» санатындағы акцияның бағасы алдыңғы күнгі жабылу бағасымен салыстырғанда 30%-дан да арзандап кетсе, онда биржа сауданы автоматты түрде тоқтата тұрады.
Осы себепті KASE акциялармен сауданы уақытша тоқтатты.
Компания не дейді?
Осыған байланысты «Қазақтелеком» АҚ ресми түсініктеме жариялады. Компанияның басқарма төрағасының бірінші орынбасары Айдос Нұрқатовтың айтуынша, бұл жағдай — нарық заңдылығына сай, қалыпты құбылыс.
«Бұл құбылыс – «дивидендтік гэп» деп аталады. Яғни, инвесторлар дивиденд алу үшін акцияны сатып алып, реестр жабылған соң оны қайтадан сатады. Мұндай техникалық құбылу әлемдік нарықта да жиі кездеседі», – деді Нұрқатов.
«Қазақтелеком» өкілі атап өткендей, қазақстандық нарықта институционалды инвесторлар үлесі аз, ал жеке инвесторлар үлесі басым. Сондықтан баға ауытқуы үлкен көлемде сезіледі.
«2023 жылдың ортасында қарапайым акциялар шамамен 30 мың теңге тұрса, 2025 жылдың мамырына дейін олар 58,4 мың теңгеге дейін өсті. Бұл телекоммуникация нарығындағы демонополизация мен активтерді оңтайландыру нәтижесі», – деді компания өкілі.
Акция бағасы қалай өзгерді?
2023 жылдың ортасында «Қазақтелеком» акциясының бағасы 30 мың теңгеден төмен еді. Бірақ телекоммуникация саласын демонополизациялау және ұялы байланыс операторындағы үлесті сату аясында акция бағасы өсіп, 2025 жылдың мамырында — акционерлер тізімі жабылар алдында — 58,4 мың теңгеге дейін жетті. Бұл — тарихи максимум.
Қанша дивиденд төледі?
Компания 2024 жыл үшін бір қарапайым және артықшылықты акцияға 26 664 теңге 88 тиын көлемінде дивиденд төлейді. Жалпы төлем сомасы 293,4 млрд теңгені құраған. Бұл сомаға 2025 жылғы қаңтарда толық сатылған «Мобайл Телеком-Сервис» компаниясынан түскен қаржы да кіреді.
Қазақстан қор биржасының (KASE) мәліметінше, Қазақтелеком акцияларының 80,85%-на «Самұрық Қазына» иелік етеді. Ал Telecom Systems LTD-ға компания акциялардың 9,19%-ы тиесілі.
Естеріңізге сала кетейік, 2025 жылғы қаңтарда Қазақтелеком 1,1 млрд долларға «Мобайл Телеком-Сервис» (МТС) компаниясын сатқан. Tele2 және Altel брендтерімен жұмыс істейтін компания Катардың Power International Holding холдингіне бұйырған.
Сауда қашан қайта басталады?
«Қазақтелеком» акцияларымен сауда-саттықты қайта бастау туралы шешім KASE ережелерінің 25-бабының 7-тармағына сәйкес қабылданады. Бұл шешімді биржа кейінірек жариялайды.
