Путин Батыс лидерлерінен Украина НАТО-ға кірмейтініне жазбаша уәде алғысы келеді

Ресей президенті Владимир Путиннің Украинадағы соғысты тоқтату бойынша шарттары белгілі болды, деп жазады Reuters.

Басылым келтіргеніндей, үш ресейлік дереккөз Путин АҚШ басқаратын НАТО альянсы шығысқа қарай кеңеймейтіні туралы Батыстың ірі елдерінен «жазбаша» уәде алғысы келетінін айтқан.

«Бұл Украина, Грузия, Молдова және басқа да бұрынғы Кеңес Одағы республикаларының мүшелігін ресми түрде болдырмау дегенді білдіреді» деп жазады Reuters.

Сондай-ақ дереккөздер Ресей Украина бейтарап ел болуы керек, Батыстың кейбір санкциялары алынып, Ресейдің активтерінен бұғат шешіліп, Украинадағы орыс тілінде сөйлейтіндердің құқығы қорғалуы керек деп санайтынын жеткізген.

Бірінші дереккөздің айтуынша, егер Путин бейбіт келісімге өз шарттарымен қол жеткізе алмайтынын түсінсе, ол украиндар мен еуропалықтарға әскери жеңістер арқылы «ертеңгі бейбітшілік бұдан да ауыр болады» дегенді көрсеткісі келеді.

Кремль Reuters агенттігінің мәселеге қатысты пікір білдіруін жауапсыз қалдырған.

Путин НАТО-ның ықтимал кеңеюі мен Батыстың Украинаға қолдауын меңзеп, бейбіт келісім қақтығыстың «негізгі себептері» шешілгенде ғана мүмкін екенін бірнеше рет айтқан. Ал Киев НАТО-ға кіруге ұмтылуына Ресейдің вето қою құқығы болмауы керек екенін қайталап келеді. Украина Батыс Ресей шабуылын тежеу үшін нақты қауіпсіздік кепілдігін беруі керек деп санайды.

Бұған дейін Трамп Путиннің өзіне уәде еткендей бейбіт келісімге келмей, Украинаға ауқымды шабуылын жалғастыруына «ол отпен ойнап жүр» деп реакция білдірген.