Гарвардқа шетелдік студенттерді қабылдауға салынған тыйым уақытша шегерілді

АҚШ-тағы Гарвард университеті шетелдік студенттерді қабылдау құқығын шектейтін Трамп әкімшілігінің шешіміне қарсы соттан уақытша шегерім алды. Бұл туралы Bloomberg агенттігі хабарлады.

29 мамыр күні Бостонда өткен тыңдауда АҚШ федералды судьясы Эллисон Бэрроуз бұған дейін енгізілген уақытша тыйымды ұзартатынын мәлімдеді. Гарвард университеті 23 мамырда АҚШ үкіметіне қарсы ресми шағым түсірген болатын. Бұған себеп – әкімшіліктің университетті шетелдік студенттерді қабылдау құқығынан айыру ниеті еді.

Судья Бэрроуз сот шешімі ештеңені өзгертпейтіндей етіп қабылданатынын атап өтті.

«Мен жағдайдың дәл қазіргі күйінде қалуын қалаймын», – деді ол. Бұл шешім АҚШ-қа келуге дайындалып жатқан шетелдік студенттерге белгілі бір қорғаныс беретінін де қосты.

Гарвард заңгерлері бұл шектеулерді университеттің сөз бостандығы құқықтарына қарсы кек алу деп бағалап отыр. Сондай-ақ, үкімет бұл шектеулерді енгізуде әкімшілік рәсімдер ережесін сақтамағанын айтады.

Айта кетейік, Трамп әкімшілігі Гарвардты антисемитизмге қарсы күресті әлсіретіп, саяси біржақтылық пен инклюзияны қолдайтын бағдарламаларды тоқтатпағаны үшін сынға алып келеді. Осы мақсатта АҚШ билігі университеттің ғылыми-зерттеу жұмыстарына бөлінетін 2,6 млрд доллардан астам федералды қаржыны тоқтатқан. Гарвард бұл шешімге қарсы бөлек сотқа жүгінген.

Қазіргі таңда Гарвардта оқитын студенттердің шамамен 27 пайызы – шетел азаматтары. Үкімет университеттің 6800-ге жуық шетелдік студенттерді қабылдау құқығын жоюды көздеген.

Бұған дейін Kursiv Гарвардқа жуырда түскен қазақстандық студенттердің де бұл жағдайға байланысты үміттерін үзбегенін хабарлаған болатын.