Ангелина Лукас туған жері Тараз қаласында IBO тұжырымы бойынша әлем чемпионы атағын қорғады.
Таразда өткен халықаралық бокс кешінің басты жекпе-жегінде қазақстандық Ангелина Лукас қарсыласына еш мүмкіндік бермей, техникалық нокаутпен жеңіске жетті.
Көптен күткен жекпе-жек Ангелина үшін ерекше маңызға ие болды — екі жыл бұрынғы жеңілістің реваншы еді.
Бастапқы раундтарда қос боксшы сақ қимылдап, бір-бірінің осал тұстарын зерттеді. Алайда үшінші мен төртінші раундтардың аралығында шешуші сәтте Лукас Асенхоға қысым жасай бастады. Басқа бағытталған бірнеше дәл соққыдан кейін чилилік спортшы қорғанысқа көшіп, айтарлықтай әлсіздік танытты.
Мұны сәтті пайдаланған Ангелина белсенді шабуылға көшіп, қарсыласын арқанға тақап тұрып соққыларын үдете түсті.
Осылайша алтыншы раундтан кейін Асенхоның бапкерлік штабы жекпе-жекті тоқтату туралы шешім қабылдады. Жекпе-жек Ангелинаның техникалық нокаутпен жеңісімен аяқталды.
Мені қолдап келген баршаңызға рақмет! Сіздерді жерге қаратпауым керек екенін білдім. Алға, Қазақстан! — деді чемпион жекпе-жектен кейін.
Еске сала кетейік, бұған дейін қазақ спортындағы ең сұлу бес боксшы қыз туралы жазған едік.
