Франция президенті Эммануэль Макрон ПСЖ футболшыларымен бірге жеңісті тойлады (видео)
Франция президенті Эммануэль Макрон «Пари Сен-Жермен» (ПСЖ) клубының ойыншыларын, бапкерін және иесін Елисей сарайында салтанатты түрде қабылдады.
Бұл кездесуге президенттің жұбайы Брижит Макрон да қатысты. Айта кетейік, бұл шара ПСЖ-ның Чемпиондар лигасындағы тарихи жеңісінен кейін ұйымдастырылды.
Сенбі күні Мюнхенде өткен финалда ПСЖ Италияның «Интер» клубын 5:0 есебімен ойсырата жеңіп, алғаш рет Еуропаның ең беделді клубтық турнирінде топ жарды. Жексенбі кешінде Париждің жүрегі — Елисей алаңында 100 мыңға жуық жанкүйер чемпиондарды асыға күтіп алды. Команда екі автобуспен Триумфаль аркасының маңын айналып өтіп, жеңіс кубогын жұртшылыққа паш етті.
Макрон ПСЖ-ны жеңісімен құттықтап, бұл жетістік Франция футболы үшін үлкен тарихи сәт екенін атап өтті.
Айта кетейік, ПСЖ жеңіске жеткеннен кейін Париж көшелерінде жаппай тәртіпсіздік басталған еді.
