Украина Ресейдің 20-ға жуық әскери ұшағын жойған – АҚШ барлау қызметі
АҚШ-тың барлау қызметі Украинаның «Өрмек» операциясы кезінде Ресей 20-ға жуық бомбалаушы және әскери ұшағынан айырылған деп болжайды. Бұл туралы The New York Times басылымы хабарлады.
Басылымның хабарлауынша, АҚШ пен Еуропаның қауіпсіздік қызметтері жексенбі күнгі шабуылдардан келтірілген шығындарын әлі де есептеп жатыр. Бірақ шамамен қанша ұшақ жойылғанын топшылауға болады. Шетелдің қауіпсіздік қызметі бұл әскери операция кезінде Ресейдің 20-ға жуық стратегиялық ұшағы жойылған немесе айтарлықтай зақымданған болуы мүмкін деп санайды.
«Бұл жағдай Ресейдің ұзақ қашықтықтағы соққы беру мүмкіндігіне нұқсан келтірді», – деп жазады басылым.
Шетелдің барлау қызметінің мәліметінше, «Өрмек» операциясы кезінде Ресей мынадай стратегиялық маңызды ұшақтарынан:
- алты Ту-95 алысқа ататын бомбалаушы ұшағынан;
- төрт Ту-22М ұшағынан;
- 10 шақты әуе қорғанысы мен басқарылатын зымырандарды анықтау үшін пайдаланылатын А-50 жойғыш ұшағынан айырылған.
Сондай-ақ АҚШ ресми қызметкерлері Украинаның Ақүй әкімшілігіне Украина қауіпсіздік қызметінің күштері Ресейдегі бірнеше әуе базасын, соның ішінде шалғайда жатқан Сібір авиабазасына шабуыл ұйымдастырып жатқаны туралы хабар берілмегенін мәлімдеген.
«Өрмек» операциясы жөнінде
Басылым Украинаның 21 ғасырдағы соғыс жүргізу тәсіліне өзгеріс енгізіп жатқанын жазған.
«Өрмек» операциясы қазіргі заманауи соғыстың шын мәнінде қандай болатынын және технологиялық тұрғыда алда болудың маңызды екенін көрсетті», – деп мәлімдеді Украина президенті Владимир Зеленский.
Украинаның Қауіпсіздік қызметі 1 маусым күні Ресейдің бірнеше айымағында әскери шабуыл ұйымдастырды. Украиндықтар Ресейдің стратегиялық маңызды әуе базаларына соққы жасады. Украина тарапы «Өрмек» операциясы кезінде 40-тан астам әскери ұшағы жойылғанын хабарлады. Ал Ресей тарапы бұл шабуылды террорлық әрекет деп бағалап, салдарынан бірнеше ұшақтың зақымданғанын мәлімдеді.
Сарапшылар пікірінше, жойылған әр ұшақтың құны 100 млн доллардан асады. Кейбір бомбалаушы ұшақтардың құны бұдан да қымбатқа шығуы мүмкін. Ал шабуыл жасаған дрондардың құны 600 доллар көлемінде. Украина Ресейге 2 млрд долларға жуық шығын келтірілгенін хабарлады.
