Жамбылда 10 жастағы бала өгей әкесінің қолынан қайтыс болды деген күдік бар
Жамбыл облысы Талас ауданында 10 жастағы бала қайтыс болды. Оны асырап алған әкесі ұрып-соққан деген күдік бар.
Қайғылы хабар жайлы алғашқылардың бірі болып желіге жергілікті журналист Айжан Әуелбекова жазды. Оқиға 31 мамырда болған. 10 жастағы жеткіншекті ауыр халде, ес-түссіз ауруханаға жеткізіліп, демі үзілген.
«Ауруханаға келгенде қабылдаушы дәрігер мен реаниматолог дәрігердің баяндауынша, өлі дененің белгілері болған. Бала демалмаған, жүрек соғысының толық тоқтауы болған. Реанимациялық шаралар жүргізілген. Қалай болғанда баланы өмірге қайтару әрекеттері жасалған, бірақ одан ешқандай жақсы хабар болмағандықтан, бала (денесі – ред.) сол қалыпта, өзгеріссіз, полиция қызметкерлеріне берілген», – деді Талас аудандық ауруханасы бас дәрігерінің міндетін атқарушы Мұратқали Әбзелбекұлы.
Бала сол күні Талас ауданы Көктал ауылындағы туыстарына барған екен. Бірақ нақты қандай жағдай болғаны әзірге белгісіз.
10 жастағы баланы және төрт бауырымен бірге Жуалы ауданындағы отбасы асырап алған. Қазір оның өліміне себепші деген күдікпен асырап алушы өгей әкесі ұсталды. 35 жастағы ер адам Тараздағы әскери гарнизондағы бөлімшелердің бірінде жұмыс істейді. Іс әскери-тергеу басқармасында, Қылмыстық кодексінің 99-бабы 3-бөлігімен сотқа дейінгі тергеу жүріп жатыр.
Облыстық білім басқармасының мәліметінше, қайтыс болған баланың балалары асырап алған отбасынан алынды.
«Оқиға орын алған күні отбасындағы патронаттық және қамқоршылық тәрбиедегі өзге балаларға медициналық және психологиялық көмек көрсетіліп, оларды дереу отбасынан алып, мемлекеттік мекемеге орналастыру туралы шешім қабылданды. Қазіргі таңда балалар мемлекеттің қамқорлығы мен қорғауында. Өзге мәліметтер тергеу мүддесіне байланысты жариялауға жатпайды», – деп жазылған Жамбыл облыстық білім басқармасының хабарламасында.
Бұл жағдайға қатысты облыстық әкімдік әзірге ресми пікір бермеді.
Бұған дейін Түркістан облысында мектеп оқушысының сабақ үстінде қайтыс болған еді. Оқиғаға байланысты мектеп директоры мен бес педагог жұмыстан шығарылды.
