Шахтадағы үйінді астынан адамдарды іздеу жүйесі енгізілді

Үйінді астынан адамдарды іздеу жүйесі «Северный» шахтасына енгізілді. Бұл шахта қауіпсіздігін арттыруға бағытталған жаңа технология.

Өнеркәсіп және құрылыс министрлігінің ақпаратына қарағанда, ол көмір өндіру саласындағы апаттар қаупін азайтуға және адам өмірін қорғауға бағытталған.

Технологияны кім жасады?

Жүйені Д.А. Қонаев атындағы Тау-кен істері институтының ғалымдары әзірледі. Бұл жоба «Северный» көмір разрезінің дренаждық шахтасында іске қосылды. Инновациялық жүйе жұмысшылардың нақты орналасуын онлайн режимде анықтап, апат болған жағдайда жедел құтқару шараларын жүргізуге мүмкіндік береді.

Жүйенің мүмкіндіктері

Қызметкердің нақты орналасқан жерін бақылайды. Үйінді астында қалғандарды жедел анықтауға жәрдемдеседі. Жерасты дауыс байланысы болады. Жарылысқа төзімді құрылғылар орнатылады. Диспетчермен тұрақты байланыс құрылады.

Бұл жүйе жер асты құлау немесе су басу жағдайларында құтқару жұмыстарын жылдамдатуға және адам өмірін сақтауға сеп болады.

Маңызды неде?

Мұндай технологиялар индустриялық қауіпсіздік пен еңбек қорғау саласында аса маңызды. Әсіресе жер асты өндіріс орындарында бұл жүйе адамдардың өмірін сақтап қалуға көмектеседі.

Айта кететін жайт, 25 мамырда Ақтөбе облысының Хромтау ауданындағы «Болашақ» шахтасында өрт шығып, үш жұмысшыны күйік шалған еді.