Шавкат Рахмонов UFC-ге қашан оралатынын айтты

Шавкат Рахмонов UFC-ге 2025 жылы қайта оралуы мүмкін екенін айтты. Ол чемпиондық белдікке таласудан бас тартпайтынын жеткізді.

Қазақстандық UFC жұлдызы Шавкат Рахмонов биыл сегізбұрышқа оралғысы келетінін мәлімдеді. Оның айтуынша, басты кедергі – жарақат.

Дайын болуым керек!

«Мен өзім де оралғым келеді. Бірақ жарақатты толық емдеп, 100% дайын болу керек. Одан кейін бәрі жағдайға байланысты болады. Әрине, бірден чемпиондық белдік үшін жекпе-жек өткізгім келеді. Бірақ оны уақыт көрсетеді. Ең бастысы — өзімнің дайын болуым», — деді Рахмонов.

Желтоқсан айындағы жекпе-жек шындық па?

Көпшілік желтоқсанда Рахмоновтың октагонға оралатынын болжап жүр. Бұл туралы спортшының өзі:

«Иә, шындыққа жанасады. Бірақ ең бастысы – жарақат мазаламаса екен. Қалғаны – менің UFC-де жекпе-жек өткізгім келіп тұрғаны анық», — деп жауап берді.

Джек Делла Маддалена туралы не ойлайды?

Шавкат қазіргі уақыттағы қарсыласы болуы мүмкін Джек Делла Маддалена туралы да пікір білдіріп кетті.

«Әрине, ол қазір чемпион. Жеңді, өзін көрсетті. Қазірше ол үздік шығар. Біз де дайындалып жатырмыз. Уақыт бәрін көрсетеді», — деді файтер.

Шавкат Рахмоновтың UFC аренасына оралуы жанкүйерлер үшін үлкен жаңалық болмақ. Толық қалпына келіп, желтоқсанда жекпе-жек өткізсе, чемпиондық белдікке бір табан жақындай түседі.

Сонымен қатар, Шавкат Рахмонов пен Белал Мұхаммад кездесуі қашан өтетіні туралы жазған едік.