Путин өзі қатысатын болса, Трамп келіссөздер үшін Түркияға келуге дайын — Ердоған
АҚШ президенті Дональд Трамп Ресей басшысы Владимир Путин келіссөзге қатысатын болса, Украинадағы соғысты тоқтату мақсатында Түркияға келуге дайын екенін жеткізді. Бұл туралы Түркия президенті Режеп Тайып Ердоған журналистермен кездесуде мәлімдеді.
Трамп егер Путин келетін болса, өзі де Түркияға келуге дайын екенін айтты. Біз шын мәнінде бейбітшілікке мүдделі барлық тарапты қарсы алуға әзірміз, — деді Ердоған.
Ердоғанның айтуынша, Анкара қазіргі уақытта қақтығысты дипломатиялық жолмен шешу үшін белсенді түрде жұмыс жүргізіп жатыр. Түркия президенті жуырда жоғары деңгейдегі кездесу ұйымдастырылып, оның тұрақты бейбіт процестің бастамасына айналатынына үміт білдірді.
Ердоған Түркияның бұған дейін де Украинадағы соғысқа қатысты бейбіт келіссөздерге делдал ретінде қатысып келгенін еске салды. Анкара дипломатиялық шешімдерге әрқашан басымдық беріп келеді.
АҚШ, Ресей және Украина тараптары мұндай кездесу мүмкіндігіне қатысты әзірге ресми пікір білдірген жоқ.
