Алматы қаласы Алмалы ауданының әкімі Сайран көліндегі қайғылы жағдайлар байланысты пікір білдірді.
Алмалы ауданының әкімі Арман Шамшин ауданның жарты жылдықтағы дамуына қатысты брифинг өткізген. Соның барысында KursivMedia тілшісі ауданға қарасты Сайран көлінде бір күнде болған қос бірдей адам қазасына байланысты сұрақ қойды.
«Жаңартылған Сайран толық ашылмай жатып, екі адам суға кеткені белгілі. Бұл жерде жауапкершілікті кім арқалайды? Тыйым салынған жерде суға түскен тұрғындардың өзі кінәлі ме, әлде тыйым салынған жерде адамдардың шомылуына жол берген, тиісті деңгейде қауіпсіздікті қамтамасыз етпеген белгілі бір тұлға ма?», – деп сұрады KursivMedia тілшісі.
Арман Шамшин азаматтық тұлға ретінде тергеуге байланысты түсініктеме бере алмайтынын жеткізді.
«Оқиға орнына арнайы қызметтер келді. Тергеу нәтижелері бойынша белгілі бір қорытындылар жасалып, олармен кейінірек таныса аласыз деп ойлаймын. Осындай оқиғаның алдын алу мақсатында жағалау аумағына кіреберістерде шомылуға тыйым салынатын ескертулер бұрын болатын. Қазір де шығыс, батыс жағындағы әрбір жерде сондай ескертулер тұр», – деді аудан әкімі
Еске сала кетейік, жаңартылған Сайран ресми ашылмаса да көлге жүздеген адам шомылып жүрген. Алайда 25 маусым күні кәмелетке толмаған балалар суға батып, оның біреуі ғана аман шыққан. Артынша сол күні Сайранда орта жастағы ер адам суға батып кеткені белгілі болды. Осыдан кейін көл аумағына қоршау қойылып, полиция рейд жүргізе бастады. Қоқыс тастағандарға айыппұл салды.
