ҚТЖ басшысының қызметін уақытша Даниал Ахметовтің туысы атқарады

«Қазақстан темір жолы» ұлттық компаниясын уақытша Ерлан Қойшыбаев басқарады. Ол басқарма төрағасының міндетін атқарушы болды.

ҚТЖ басшысын әлі ресми түрде тағайындау болған жоқ.

«Ішкі нормативтік құжаттарға сәйкес, логистика жөніндегі басқарма төрағасының орынбасары ҚТЖ басшысының міндетін уақытша атқарады», – деп хабарлайды баспасөз қызметінен.

ҚТЖ-ның бұрынғы басқарма төрағасы Нұрлан Сауранбаев маусымда көлік министрі болып тағайындалған еді. Бұрынғы көлік министрі Марат Қарабаев мемлекет басшысы Қасым-Жомарт Тоқаевтың сынынан кейін қызметінен босады.

Ал «ҚТЖ» қазіргі басшысы Ерлан Қойшыбаев саясаткер Даниал Ахметовтың қызы Аделя Ахметоваға үйленген. Даниал Ахметов 2014-2023 жылдар аралығында Шығыс Қазақстан өңірінің әкімі болған еді.

2024 жылы «Қазақстан темір жолы» 160,8 млрд теңге таза табыс түсірді, ол 2023-пен салыстырғанда 17,5%-ға көп.