Трамп пен Путин Украинадағы соғыс туралы сөйлесті

АҚШ президенті Дональд Трамп пен Ресей президенті Владимир Путин Украинадағы соғыс жайлы телефон арқылы сөйлесті, алайда бітім жөнінде ешқандай келісімге келе алмады. Бұл туралы Трамп журналистерге Вашингтон маңындағы «Эндрюс» әскери әуе базасында мәлімдеді.

«Жоқ, мен Путинмен бұл мәселе бойынша ешқандай прогреске жеткен жоқпын», — деді Трамп.

Украинада соғысты тоқтату жөнінде қандай да бір келісімге қол жеткізілді ме деген сұраққа жауап бере отырып. Сондай-ақ Трамп Украинадағы соғыстың жалғасып жатқанына «қанағаттанбайтынын» айтты.

Тараптар арасындағы бұл телефон әңгімесі шамамен бір сағатқа созылған. Ресей президентінің көмекшісі Юрий Ушаковтың айтуынша, бұл — Трамп қаңтарда екінші мерзімге президенттікке қайта кіріскеннен бергі қос мемлекет басшылары арасындағы алтыншы байланыс.

Ушаковтың сөзінше, Путин Трампқа Ресейдің Украинада көздеген мақсаттарынан бас тартпайтынын жеткізген.

«Біздің президент Ресей қазіргі шиеленіскен жағдайға алып келген белгілі алғышарттарды жою мақсатын көздеп отырғанын айтты. Бұл мақсаттардан Ресей бас тартпайды», — деді Ушаков ТАСС агенттігіне.

Сонымен қатар, Путин Украинаның қатысуымен келіссөздерді жалғастыруға дайын екенін білдірген. Ал Трамп әскери әрекеттерді мүмкіндігінше тезірек аяқтау қажеттігін тағы да көтерген.

Алайда, екі ел басшылары Украина мен Ресей арасындағы келіссөздердің үшінші раунды туралы талқыламады. Бұған дейін Ердоған тараптар арасында келіссөз өтетін болса Түркия алаң ұсынуға әрқашан дайын екенін айтқан еді.