Баланы тегін үйірмеге қалай тіркеуге болады
Ата-аналар 4 пен 18 жас аралығындағы балаларын Mindal24.kz платформасы арқылы тегін үйірмелер мен секцияларға жаздыра алады.
Бағдарлама қай қалаларда қолжетімді
Mindal24.kz платформасы Қазақстанның бірнеше қаласында жұмыс істейді:
- Астана
- Шымкент
- Қостанай
- Қонаев
- Атырау
- Екібастұз
- Петропавл және басқа да облыс орталықтары мен ірі қалалар.
Аталған платформада тұрғылықты қалаңыз болмаса, басқа балама ресурстарды қарап көруге болады. Мәселен, Алматы қаласы үшін bilimalmaty.kz, damubala.kz және ондаған тегін секцияны қамтитын artsport.edu.kz платформасы.
Қандай бағыттар бар?
Бұл платформада 25-тен астам бағыт ұсынылған. Солардың кейбірі:
- робототехника
- компьютерлік графика
- жүзу
- лего-құрастыру
- шет тілдері
- актерлік шеберлік
- би
- менталды арифметика
Балалар 4 жастан 18 жасқа дейін осы секциялар мен үйірмелерге қатыса алады. Жылына тегін түрде 2 бағытқа дейін таңдауға болады.
Өтініш беру үшін не қажет?
- Баланың фотосы (портрет)
- 027 анықтама (Egov Mobile арқылы алуға болады)
- ed24.kz қосымшасы (Android және iOS үшін), хабарландырулар қосулы болуы тиіс
Бала бір мезгілде mindal24.kz пен басқа платформалардағы (мысалы, damubala.kz немесе artsport.edu.kz) секцияларға да қатыса алады. Ай сайын сабаққа қатысу табелін қол қою арқылы растау керек, олай болмаған жағдайда сабаққа қатысу тоқтауы мүмкін.
Айта кетейік, елімізде спорт секцияларына тегін қатысуға мүмкіндік беретін жаңа жүйе іске қосылады. Енді әр балаға қаржылық ваучер төленеді.
