Перизат Қайраттың қорды құру барысында қалай әрекет еткені айтылды

Астана сотында Перизат Қайраттың жоғары білімі жоқ екені айтылды. Айыптау актісіне сәйкес, ол табысты әйел образын қалыптастыру мақсатында Біріккен Араб Әмірліктерінде тұрғаны және ет жеткізу бойынша отбасылық бизнесті дамытқаны туралы жалған ақпарат таратқан.

Айыптау актісіне сәйкес, 2021 жылдың 11 қазанында «Biz Birgemiz» қоғамдық бірлестігі тіркелген. Осыдан кейін Перизат Қайрат пен анасы Ғайни Алашбаева банк шоттарын ашқан.

«Перизат Қайрат әлеуметтік желідегі парақшасында азаматтарды қайырымдылық жасауға шақырып, жиналған қаражатты төтенше жағдайдан зардап шеккендерге гуманитарлық және материалдық көмек ретінде беретінін айтқан. Жиналған қаражаттың бір бөлігі расында қайырымдылық акцияларына жұмсалған, бұл қордың қоғам алдындағы оң имиджін қалыптастыруға көмектескен», – деді мемлекеттік айыптаушы.

Алайда прокурордың айтуынша, жиналған қаражаттың басым бөлігін Перизат Қайрат пен оның анасы жеке қажеттеріне жұмсаған. Оның ішінде әшекей, қымбат заттар сатып алған, саяхатқа жұмсаған.

Мемлекеттік айыптаушының айтуынша, қорды құру кезінде де заңбұзушылықтар болған. Қазақстанның «Қоғамдық бірлестіктер туралы» заңының 10-бабына сәйкес, қорды тіркеу үшін кемінде үш азаматтың бастамасы қажет. 2021 жылғы 14 қыркүйекте Перизат Қайрат құрылтай жиналысының хаттамасын дайындаған. Онда ол өзін, сондай-ақ Матюшенко, Мағзұм, Тұрғанбай, Аманбай, Болысов, Хисматулинов, Серікжанов, Сеиткамал және Хафизді құрылтайшы ретінде көрсеткен. Жиналыста жарғы қабылданып, басқару органдары құрылып, Қайрат президент болып сайланған. Алайда айыптау актісіне сәйкес, жиналыс төрағасы мен хатшысы ретінде көрсетілген Матюшенко мен Серікжанованың, сондай-ақ басқа құрылтайшылардың қолдары қолдан жасалған.

«2021 жылғы 27 қыркүйекте Қайрат бірлестікті тіркеуге құжаттарын өткізген, бірақ Астана қалалық Әділет департаменті атаудың ұқсастығына байланысты тіркеуден бас тартқан. Бұдан кейін 2021 жылғы 4 қазанда ол атауды «Biz Birgemiz Kazakhstan 2030» деп өзгертіп, жаңа хаттамаға да жалған қолдар қойып, құжаттарды қайта тапсырған. Тіркеу сәтті аяқталған. Алайда қордың заңды мекенжайы ретінде Астанадағы Рахымжан Қошқарбаев көшесі, 4-үй, МП 66 көрсетілген. Кейін анықталғандай, бұл мекенжайда шын мәнінде «Лига» компьютерлік ойын клубы орналасқан», – деп мәлімдеді мемлекеттік айыптаушы.