Әрбір үшінші жолаушылар бағдарына жеке тасымалдаушылар қызмет көрсетеді

Қазақстанда жолаушылар тасымалын «Жолаушылар тасымалы» АҚ және 14 жеке теміржол компаниясы жүзеге асырады. Бұл туралы «Жолаушылар тасымалы» АҚ баспасөз қызметі хабарлады.

Жеке операторлар 30 бағдарға қызмет көрсетеді – бұл жалпы санның 28%-ы, қалғаны (72% немесе 112 бағдар) ҚТЖ-ға тиесілі.

Жеке тасымалдаушылардың қызметін Көлік министрлігі реттеп, сонымен бірге олардың көпшілігін субсидиялайды. ҚТЖ вагондарының орташа жасы – 16 жыл, ал жеке операторларда – 28 жыл.

2030 жылға қарай ҚТЖ жолаушылар паркін толығымен жаңартуды жоспарлап отыр. Жаңғырту бағдарламасы шеңберінде Stadler-ден 557 вагон жеткізу көзделген, оның алғашқы 51 вагоны жыл соңына дейін келіп түседі деп күтілуде. Бұған қосымша ҚТЖ 2025 жылы Петропавлдағы зауытта өндірілген 107 вагон сатып алмақ.

Таяуда Астана – Бурабай курорты және Астана – Қарағанды бағыттарында үш электр пойызы (18 вагон) пайдалануға берілген.

Сондай-ақ, 2027 жылға дейін жеткізілімі қарастырылған тағы 350 отандық вагонды жеткізуге шарт жасасу жоспарланған.

Бүгінгі таңда ҚТЖ паркінде 2 167 бірлік вагон бар. Олардың 732-сі Talgo вагоны, 1 321-і стандартты вагон және 115-і мотор-вагон құрамы.

Бұған дейін, Алматы – Саратов бағытына жаңа вагондар шыққалы жатқанын жазғанбыз.