Грузияда визалық ережелер қатаңдайды: қазақстандықтарға қалай әсер етеді
2024 жылғы 1 қазаннан бастап Грузияда шетел азаматтарының, соның ішінде қазақстандықтардың елде болуына қатысты жаңа ережелер күшіне енеді. Бұл туралы «Sputnik Грузия» басылымы хабарлады. Енді визалық режимді бұзғандар үшін елге қайта кіруге бірнеше жылға тыйым салынуы мүмкін.
Жаңа айыппұлдар және елден шығаруға тыйым салу мерзімдері
| Визаны асыра пайдаланған мерзім | Айыппұл | Елге қайта кіруге тыйым салу |
|---|---|---|
| 3 айға дейін | 1 000 лари (шамамен 195 000 теңге) | 6 айға дейін |
| 1 жылға дейін | 2 000 лари (шамамен 390 600 теңге) | 2 жылға дейін |
| 1 жылдан көп | 3 000 лари (шамамен 585 900 теңге) | 3 жылға дейін |
Бұрын шетел азаматтары визалық режимді бұзған жағдайда тек айыппұл төлеп, кейін қайта елге кіре алатын. Енді бұл қатаң шектеулермен алмастырылады.
Көмек көрсеткендер де жауапқа тартылады
Грузия билігі шетелдіктердің елде заңсыз қалуына жәрдемдескен жеке тұлғалар мен компанияларға да 2 000 лари (шамамен 390 600 теңге) көлемінде айыппұл салатынын мәлімдеді.
1 қазаннан бастап елден шығаруға қатысты жаңа тәртіп те күшіне енеді. Енді заңсыз шекара асқандарға, мигранттарды тасымалдаған немесе оларға көмектескендерге түрме жазасының орнына елден шығарылып, ұзақ мерзімге кіруге тыйым салынуы мүмкін.
- Шағын қылмыстар үшін – елге қайта кіруге 2 жылдан 10 жылға дейін тыйым салу;
- Ауыр және аса ауыр қылмыстар үшін – 5 жылдан 20 жылға дейін, кей жағдайда өмір бойына елге кіруге тыйым салынады.
Сот шетелдікті елден шығару туралы шешімді тіпті Қылмыстық кодексте бұл жазалау түрі көрсетілмеген жағдайда да қабылдай алады, егер оның елде болуы тиімсіз деп таныса.
Алайда мәжбүрлеп елден шығаруға тыйым салынатын жағдайлар да бар
Егер шетелдік азамат басқа елде қудалауға, саяси қысымға немесе адам құқықтарының бұзылуына ұшырау қаупінде болса, Грузия билігі оны мәжбүрлі түрде елден шығармайды. Мұндай шешімдер әр жағдайды жеке қарау арқылы қабылданады.
Еске сала кетейік, Қазақстан азаматтары Грузия аумағында визасыз бір жылға дейін еркін жүре алады.
