HBO Max платформасы үшін арнайы дайындалып жатқан Хәрри Поттер туралы жаңа телесериалдың түсірілімі ресми түрде басталды. Жобаның алғашқы жұмыстары Ұлыбританиядағы Warner Bros. студиясында, Ливсден қаласында жүріп жатыр. Бірінші маусымның премьерасы 2027 жылға жоспарланған.
Басты рөлдерде — жас актерлер
Хәрри Поттердің рөлін Доминик Маклафлин, Гермионаны — Арабелла Стэнтон, ал Рон Уизлиді — Аластер Стаут сомдайды. Студия алғашқы кадрды жариялап үлгерді, алайда оқиға желісі жайлы нақты ақпарат әзірге құпия сақталып отыр.
Актерлік құрам сәуір айында толық бекітілді. Хәрри Поттердің ұстаздарын және Хогвартс мектебінің басқа қызметкерлерін белгілі актерлер ойнайды:
- Альбус Дамблдор — Эмми сыйлығының иегері Джон Литгоу
- Северус Снейп — Паапа Эссиеду
- Рубеус Хагрид — Ник Фрост
- Минерва Макгонагл — «Оскар» сыйлығына үміткер Джанет Мактир
- Квиррелл профессор — Люк Таллон
- Аргус Филч — Пол Уайтхаус
HBO өкілдерінің айтуынша, бұл сериал бұрынғы фильмдердің ремейкі емес, керісінше кітаптардың толық, терең және ретті түрде бейнеленген нұсқасы болмақ. Жоба Джоан Роулингтің түпнұсқа идеясына адалдық таныта отырып, қазіргі заман көрермендеріне лайық жаңа форматта ұсынылады.
