Еурокубок: «Ақтөбе» мен «Ордабасы» матчтарын тікелей эфирден қайдан көруге болады?

2025/26 маусымдағы Еурокубок додасының алғашқы іріктеу кезеңінде екі қазақстандық клуб — «Ақтөбе» мен «Ордабасы» екінші ойындарын өткізеді. Жауап кездесулер 17 шілде, бейсенбі күні өтеді.

«Ақтөбе» — «Легия» (Польша)

«Ақтөбе» клубы — ел Кубогының иегері және Қазақстан Премьер-лигасының қола жүлдегері. Команда Еуропа лигасының бірінші іріктеу кезеңінде Польшаның «Легия» клубымен кездеседі.

Алғашқы матч Польшада 1:0 есебімен варшавалық команданың пайдасына аяқталған. Жеңіс добын армян шабуылшысы Ваган Бичахчян соқты.

Жауап ойыны Ақтөбедегі Орталық стадионда сағат 21:00-де басталады. Тікелей эфирді «Qazaqstan» телеарнасы көрсетеді. Бұл жұптың жеңімпазы Еуропа лигасының екінші іріктеу кезеңіне өтеді, ал жеңілген команда Конференция лигасының келесі кезеңіне ауысады.

Айта кетейік, қазіргі таңда «Ақтөбе» Премьер-лигада төртінші орында тұр. Ал Польша чемпионаты әлі басталған жоқ — «Легия» өткен маусымды бесінші орынмен аяқтаған.

«Ордабасы» — «Торпедо» (Кутаиси, Грузия)

Шымкенттің «Ордабасы» клубы Конференция лигасының бірінші іріктеу кезеңіне Премьер-лигадағы төртінші орын арқылы жолдама алды. Қарсыласы — өткен маусымда Грузия чемпионатының күміс жүлдегері атанған Кутаисидің «Торпедо» командасы.

Алғашқы матч Грузияда өтті. Шымкенттіктер соңғы минуттарда соғылған голдың кесірінен 3:4 есебімен жеңілді. «Ордабасы» сапынан румын жартылай қорғаушысы Михай Кэпэцынэ, грузиялық Лука Имнадзе және қазақстандық қорғаушы Сагадат Тұрсынбай көзге түсті.

Жауап ойыны Шымкенттегі Қажымұқан Мұңайтпасов атындағы стадионда сағат 21:00-де басталады. Тікелей трансляцияны «Qazsport» телеарнасы ұсынады. Екі матчтың қорытындысы бойынша жеңімпаз келесі кезеңге өтеді, ал жеңілген команда жарысты аяқтайды.

2019 жылы осы екі команда Еуропа лигасының алғашқы іріктеу кезеңінде де кездесіп, «Ордабасы» екі ойында да жеңіске жеткен — 1:0 (үйде) және 2:0 (қонақта).

Еске сала кетейік, бұған дейін Чемпиондар лигасында алматылық «Қайрат» словениялық «Олимпия» командасын ұтып, келесі кезеңге жолдама алды.