Алматыда жанармай сақталған қойма өртеніп жатыр

21 шілде күні Алматы қаласының Жетісу ауданындағы Тобаяқов көшесінде орналасқан қоймадан өрт шықты. ҚР Төтенше жағдайлар министрлігінің мәліметінше, нысан түгелімен отқа оранған.

Өрт туралы хабарлама 112 қызметіне күндіз түскен. Оқиға орнына жедел түрде ТЖМ-ның бірнеше бөлімшесі жіберіліп, жоғары деңгейдегі қиындықпен жұмыс жүріп жатыр.

«Өртті сөндіру үлкен көлемдегі жанғыш заттардың болуы және қуатты жылу сәулесінің таралуына байланысты қиын болып отыр», – деп хабарлады ТЖМ.

Қазіргі таңда өрт үш бағыт бойынша оқшауланған. Өртті сөндіру жұмыстарын Алматы қаласы ТЖД бастығы жеке өзі басқарып жатыр. Оқиға орнында жедел штаб құрылып, қаланың барлық шұғыл қызметі жұмылдырылған.

112 қызметіне жарақат алғандар туралы ақпарат түскен жоқ. Өрттің нақты шығу себебі анықталып жатыр.