Депутат Бақытжан Базарбек Алматы облысы әкімінің отставкаға кетуін сұрады

Мәжіліс депутаты Бақытжан Базарбек Алматы облысының әкімі Марат Сұлтанғазиевтің отставкаға кетуін талап етті. Бұл талапты Бағанашылдағы №1 балалар үйі төңірегіндегі дауға байланысты жария етті.

Бағанашылдағы балалар үйі маңындағы бассыздық пен қоғамға берілген уәдесін орындамағаны үшін президент Қасым-Жомарт Тоқаевтан Алматы облысының әкімі Марат Сұлтанғазиевті отставкаға жіберуді сұраймын, — деді депутат Facebook парақшасында.

Бақытжан Базарбектің айтуынша, балалар үйі орналасқан жер телімі біреулердің көзіне түсіп, қызығушылық тудырған. Бұл учаске Бостандық ауданында, әл-Фараби даңғылының жоғарғы жағында орналасқан және құрылыс салушылар үшін өте құнды аймақ саналады.

Айта кетейік, бұған дейін президент Қасым-Жомарт Тоқаев Алматыдағы №1 балалар үйінің тәрбиеленушілерін Қонаев қаласына көшіру туралы шешімді тоқтатқан еді.

Қазір бұл жағдай бойынша Президент әкімшілігі қызметтік тергеу жүргізетінін хабарлады.