Украина Ресейден 7 млрд доллар өндіріп алғысы келеді

Украина халықаралық арбитражды сот арқылы Ресейден 7 млрд доллар өндіріп алғысы келеді. Бұл жайлы президент Владимир Зеленский өзінің телеграм-арнасында жазды.

Зеленский бұл мәселені «Нафтогаз Украина» басшысы Сергей Корецкиймен бірге талқылаған. Айтуынша, халықаралық арбитраждарда жалпы сомасы 6,9 млрд долларын құрайтын бірнеше оң шешім қабылданды.

«Бұл – Ресей мен «Газпромның» жауапкершілігін көрсететін, толықтай әділ шешім», – деп жазды ол. 21 шілдеде украиналық елшілерге қажетті тапсырмалар берілген.

Бұған дейін маусымда «Нафтогаз» Цюрихтегі халықаралық арбитраж шешімін орындау үшін «Газпромнан» 1,37 млрд долларын төлеуді талап еткен еді. Сондай-ақ бұл талапты ерікті түрде орындамаған жағдайда, активтерді мәжбүрлеп өндіріп алу процедурасын бастайтынын ескертті.

Ал 2024 жылы Киев Ресейден әскери әрекеттер нәтижесінде келген залалды өтеу үшін 1 трлн доллар талап еткен.  Украина премьер-министрі Денис Шмыгаль сөзінше, соғыстан кейін елді қалпына келтіру үшін  14 жыл және 1 трлн доллар қажет.