Украина президенті Владимир Зеленскийдің мәлімдеуінше, Ресеймен келіссөздердің келесі кезеңі осы аптада Түркияда өтпек.
«Бүгін мен Рустем Умеровпен тұтқын алмасу және ресейлік тараппен Түркияда өтетін тағы бір кездесу бойынша дайындықты талқыладым. Умеров кездесудің сәрсенбіге жоспарланғанын жеткізді», – деді Зеленский.
Келіссөздердің күні әлі нақтыланбады
ТАСС агенттігі ресейлік дереккөзге сілтеме жасап, келіссөздер 24 шілдеде өтетінін хабарлады. Алайда делегациялар Ыстанбұлға 23 шілдеде келуі мүмкін екенін де жоққа шығармады. Артынша, ТАСС Түркиядағы дереккөзге сүйене отырып, келіссөздердің нақты күні 23 шілде екенін жазды.
Германия Украинаға бес Patriot жүйесін беруге ниетті
Сол күні, 21 шілде, Германия қорғаныс министрі Борис Писториус «Рамштайн» форматындағы Қорғаныс бойынша байланыс тобының онлайн отырысында Украинаға бес қосымша Patriot әуе шабуылынан қорғаныс жүйесін беру қажеттігін мәлімдеді.
«Мен АҚШ қорғаныс министрі Пит Хегсеттің қатысуымен Германияның бес аса қажет Patriot жүйесін жеткізуге үлес қосатынына келістім», – деді Писториус.
Оның айтуынша, алдағы күндері мамандар тобы жиналып, жүйелерді жеткізу жолдарын нақтыламақ.
Еске сала кетейік, бұған дейін Еуропадағы кейбір елдер Украина үшін америкалық қару-жарақ сатып алудан бас тартқан еді.
