Hyundai компаниясының Қазақстандағы өкілдігі Palisade жол талғамайтын көлігінің екінші буынын отандық нарыққа шығаруға дайындалып жатыр. Бұл кроссовер алғаш рет 2024 жылдың соңында жұртшылыққа таныстырылған болатын және қазіргі таңда көлік құралының типін мақұлдау туралы куәлік (ОТТС) алған.
Құжатқа сәйкес, жаңа Palisade Алматыдағы зауытта құрастырылады және 3 қатарлы салонымен 7 және 8 орындық нұсқаларда ұсынылады. Көлік жалғыз ғана қозғалтқыш түрімен шығарылады. Бұрынғы 3.5 литрлік атмосфералық 249 ат күшіндегі мотордың орнына енді 2.5 литрлік турбомотор орнатылған. Ол екі қуат нұсқасында болады: 249 және 281 ат күші, алайда екеуінің де айналу моменті бірдей, яғни 422 Нм болады.
Құжаттарда Palisade көлігінің жаңа буыны шыққаннан кейін де Қазақстан нарығында Caligraphy нұсқасы сақталатыны айтылады. Бұл нұсқа жабдықталу жағынан қымбатырақ, әрі ерекше болады. Бұл модель кәдімгі кроссоверден 5 мм ұзын болады — 5065 мм, ал кәдімгі нұсқаның ұзындығы 5060 мм.
Көліктің жабдықталуы туралы нақты мәліметтер әлі аз. Нұсқасына байланысты Palisade 18, 20 немесе 21 дюймдік доңғалақтармен жабдықталуы мүмкін. Ал ең қымбат нұсқаларында жүргізушіге арналған кеңейтілген ассистенттер жиынтығы болатыны күтілуде.
Palisade бағасы да әзірге белгісіз. Қазіргі модель дилерлер арасында 31,8 млн-ден 33,3 млн теңгеге дейін бағаланады, бұл баға акциялар мен арнайы ұсыныстарды есептемегендегі сома.
