Алматы қаласында ғалым, сүннит мектебінің төрт имамының бірі Әбу Ханифа атындағы мешіт ашылды. Kursiv LifeStyle тілшілері жаңа ғимаратпен танысты.
Мешіт мегаполистің Медеу ауданындағы Халиуллин көшесінде ашылды. Бұған дейін ол жерде 1998 жылы салынған «Нұрлы» мешіті тұрған. Жаңа ғимараттың ашылу салтанатына Алматы қаласының бас имамы Төлеби қажы Оспан қатысты.
Мүфтият мәліметінше, жамағат сұранысы мен мүфтият шешіміне сай, мешітке ғұлама, Ханафи мәзһабының негізін қалаушы Әбу Ханифа есімі берілді.
Мұсылмандар үйі кәсіпкер Рифат Самигуллиннің қолдауымен тұрғызылды.
Ғимараттың ерекше дизайны бірден көзге түседі. Оның қыры көп сәулеті біз көріп жүрген мешіттерден ерек. Аула ішіне жаңа орындықтар мен қоқыс жәшіктері орнатылған. Оның бәрі ғимараттың өзі секілді жалтырап тұр.
Мешіт ішінде кең ғибадатхана, әйелдерге арналған зал, тазалық бөлмесі, неке қию залы және Құран оқитын бөлме бар.
Мешіттің бас қақпасының сол жағында биік күмбез орнатылған. Ол бетон мен әйнектен дайындалған. Ал ең оның басына жарты Ай орнатылған.
Әбу Ханифа Нұғман ибн Сәбит VIII ғасырда өмір сүрген ғұлама ғалым. Оны ислам дініндегі сүннит бағытындағы төрт мәзһабының бірі – Ханифаның негізін қалаушы деп атайды. Қазақстандағы мұсылмандар жамағаты өзін осы мәзһабқа жатқызады.
