«Астана» мен «Ақтөбе» Конференция лигасында жауапты матчтарын қайдан көруге болады

Бүгін 31 шілде күні Қазақстанның екі клубы – «Астана» мен «Ақтөбе» Еуропа Конференциялар лигасының екінші іріктеу кезеңінің жауапты матчтарын өткізеді.

Зимбру – Астана

«Астана» Кишинев қаласында (Молдова) жергілікті «Зимбру» командасына қарсы алаңға шығады. Астанада өткен алғашқы кездесу 1:1 есебімен тең аяқталған болатын. Бүгінгі матчтың тікелей трансляциясы Астана уақытымен 22:00-де басталады және Qazsport телеарнасынан көрсетіледі.

Бұл жұптың жеңімпазы үшінші іріктеу кезеңінде Солтүстік Македонияның «Вардары» мен Швейцарияның «Лозанна» арасындағы кездесудің үздігімен кездеседі. Айта кетейік, бірінші ойында «Вардар» күтпеген жерден «Лозаннаны» 2:1 есебімен жеңген болатын.

Спарта Прага – Ақтөбе

Ал «Ақтөбе» командасы Чехияда «Спартаға» қарсы қарымта ойын өткізеді. Алғашқы кездесуде ақтөбеліктер 2:1 есебімен жеңіске жеткен еді. Бүгінгі матч 23:00-де басталады және Qazaqstan телеарнасынан тікелей эфирде көрсетіледі.

Егер «Ақтөбе» келесі кезеңге өтсе, онда олар Арменияның «Арарат-Армениясы» мен Румынияның «Университатя Клуж» командалары арасындағы ойынның жеңімпазымен кездеседі.

Еске сала кетейік, бұған дейін алматылық «Қайрат» Чемпиондар лигасында үшінші кезеңіне өтіп, 6 тамыз күні словакиялық Слован Братиславамен ойнайды.