Алматының тағы екі ауданында азық-түлік жәрмеңкесі ашылады

Алматыда жәрмеңке өткізуге болатын Алмалы және Жетісу аудандарында жаңа сауда алаңдары ашылады. Бұл туралы қала әкімдігі хабарлады.

«Тамыздан бастап Алмалы ауданында жаңа жәрмеңке алаңы жұмыс істей бастайды. Сондай-ақ Жетісу ауданында да жаңа сауда орны ашылады. Қазір демалыс күнгі жәрмеңкелер Алматының Алмалы, Әуезов, Бостандық, Медеу және Алатау сынды бес ауданында тұрақты түрде өтіп келеді», – делінген ақпаратта.

Жаңа алаңдардың іске қосылуы қала тұрғындарына фермерлер мен жергілікті өндірушілерден табиғи әрі жаңа өнімдерді делдалсыз, қолжетімді бағамен сатып алуға мүмкіндік береді.

Қазір жәрмеңкелерге 328 ауыл шаруашылығы өндірушісі өнімдерін ұсынып отыр. Мұнда жаңа піскен көкөністер мен жемістерден бастап, ет және сүт өнімдері, нан-тоқаш бұйымдары, бал, кептірілген жемістер мен ара шаруашылығы өнімдеріне дейін таңдау бар.

Барлық өнім Алматы облысының Қарасай, Іле, Талғар, Жамбыл және Еңбекшіқазақ аудандарындағы фермерлік және жеке шаруашылықтардан, сондай-ақ, Алматының жеткізушілерінен келіп түседі.

Орта есеппен алғанда, бір демалыс күнінде жәрмеңкелерде 800 тоннадан астам өнім саудаланады. Сауда сенбі және жексенбі күндері сағат 09:00-ден 18:00-ге дейін өтеді:

Алмалы ауданы — Масанчи көшесі (Әйтеке би және Гоголь көшелерінің арасы);

Әуезов ауданы — Өтеген батыр көшесі (Абай даңғылының төменгі жағында);

Бостандық ауданы — Қазақфильм шағынауданы (әл-Фараби даңғылының жоғарғы беткейінде);

Медеу ауданы — Меңдіқұлов бульвары мен Бектұров көшесінің қиылысы;

Алатау ауданы — «Мәдениет» тұрғын үй кешені.