Елена Рыбакина Монреальдағы турнирдің ширек финалына жолдама алды

Елена Рыбакина Канаданың Монреаль қаласында өтіп жатқан WTA-1000 турнирінің 1/8 финалында украиналық Даяна Ястремскаяны 5:7, 6:2, 7:5 есебімен жеңіп, жарыстың ширек финалына шықты. Қарсыластар кортта 2 сағат 34 минут өткізді.

Бірінші сетте Елена брейкпен алға шығып, 5:6 кезінде өз геймінде 40:0 есебімен алда болды. Алайда қатарынан бес ұпай ұтылып, партияны қарсыласына беріп қойды.

Екінші сетте қазақстандық теннисші басымдықты толығымен өз қолына алды. Ол үшінші және жетінші геймдерде брейк жасап, сетті 6:2 есебімен жеңді.

Шешуші партияда ойын қайта шиеленісті. Екі теннисші бір-бір брейкпен алмасты. 5:5 есебінде Рыбакина маңызды брейк жасап, жеңіске бір қадам қалды. Соңғы геймде Ястремская қайталап брейк жасауға тырысты. Елена үш матчболын жіберіп алғанымен, төртіншісінде матчты нүктеледі.

Ойын барысында Рыбакина жеті эйс пен тоғыз қосарланған қате жасады. Ол тоғыз брейк-пойнттың бесеуін тиімді пайдаланса, Ястремская жеті мүмкіндіктің үшеуін іске асырды.

Бұл жеңіс — Еленаның соңғы айларда жіберіп алған мүмкіндіктерінен кейінгі маңызды жетістігі. Бұған дейін ол Берлинде, Ролан Гаррос пен Вашингтонда шешуші сәттерде жеңісті қолдан берген еді.

Ширек финалда Рыбакина тағы бір украиналық спортшы — Марта Костюкпен кездеседі. Бұл ойын Рыбакина үшін тек жолдаманың ғана емес, спорттық сенімділіктің де сынағы болмақ.