Qonaev Cup: Алматы маңында халықаралық шахмат фестивалі басталды
2025 жылғы 4–12 тамыз аралығында Алматы облысының Алмалыбақ ауылындағы Олимпиадалық даярлық орталығында халықаралық деңгейдегі ірі шахмат додасы – «Almaty Region Open. Qonaev Cup 2025» фестивалі өтіп жатыр. Бұл шара Қазақстан Кубогының үшінші әрі шешуші кезеңі болып саналады және классикалық шахматтағы ең беделді турнирлердің біріне айналып келеді.
Қазақстан Кубогы: жаңа формат, жаңа деңгей
KazChess (Қазақстан шахмат федерациясы) 2023 жылдан бастап классикалық шахмат бойынша ел Кубогын жаңа форматта – швейцар жүйесі бойынша өтетін үш кезең және айналмалы жүйедегі финал арқылы ұйымдастырып келеді. Финалда 12 үздік шахматшы бақ сынайды. Биылғы маусымда Ақтөбе мен Өскеменде өткен алғашқы екі кезеңде гроссмейстерлер Алексей Сарана (Сербия) мен Алексей Гребнев (FIDE) жеңіске жеткен болатын.
Qonaev Cup – шешуші кезең
Үшінші кезең – Qonaev Cup 2025 – Алматы облысы әкімдігі мен ҚР Туризм және спорт министрлігінің қолдауымен өтіп жатыр. Бұл фестиваль аясында үш деңгейдегі турнир ұйымдастырылған:
- Masters – рейтингі 2400 және одан жоғары шахматшылар үшін;
- Challengers – рейтингі 1900–2399 аралығында;
- Open – рейтингі 1400–1899 аралығындағы шахматшылар үшін.
Барлық партиялар классикалық 90 минут + 30 секунд уақыт бақылауымен, 9 турда өтеді.
4 тамыздағы ашылу салтанатынан кейін басталған басты турнирге 15 елден 68 шахматшы тіркелді. Оның ішінде:
- 22 гроссмейстер,
- 25 халықаралық шебер,
- 3 әйелдер арасындағы гроссмейстер бар.
Ең жоғары рейтингке ие қатысушылар қатарында:
- Бассем Амин (Египет, 2633) – Африка құрлығының №1 шахматшысы,
- Арам Акопян (Армения, 2621) – Pavlodar Open 2024 жеңімпазы,
- Максим Матлаков (FIDE, 2608) – 2023 және 2025 жылдардағы әлем чемпиондары құрамында ойнаған шахматшы.
Ел намысын қорғайтын алдыңғы қатарлы шахматшылар ішінде:
- Денис Махнёв (2535),
- Әлішер Сүлейменов (2497),
- Жандос Ағманов (2483),
- Даниял Сәпенов (2414),
- Сондай-ақ Арыстанбек Оразаев, Азамат Өтеғалиев және Рамазан Жалмаханов сынды тәжірибелі ойыншылар бар.
Әйелдер арасындағы бәсеке де қыза түспек
Қазақстан құрамасының қазіргі және болашақ мүшелері арасынан да мықтылар қатысуда:
- Зарина Нұрғалиева (2336),
- Ксения Балабаева (2332),
- Меруерт Камалиденова (2323),
- Алуа Нұрман (2306),
- Зейнеп Сұлтанбек (2067) – «Oskemen Open» турнирінің сенсациясы.
Қомақты жүлде қоры
- Masters турнирінің жүлде қоры – 78 000 доллар, бас жүлде – 18 000 USD.
- Challengers – 15 000 доллар (жеңімпазға 4000 USD).
- Open – 7000 доллар (жеңімпазға 2000 USD).
Әр санатта әйелдер арасындағы үздік және жергілікті шахматшы үшін арнайы сыйлықтар да тағайындалған.
«Almaty Region Open. Qonaev Cup 2025» фестивалі — тек спорттық бәсеке емес, сонымен қатар шахмат мәдениетін кеңейтіп, халықаралық серіктестікті нығайтатын алаң. 12 тамызға дейін жалғасатын турнирлерде жанкүйерлер жоғары деңгейдегі ойындардың куәсі болмақ. Жеңімпаздар кейінірек өтетін Қазақстан Кубогының финалына жолдама алады.
