Балқашта ер адам 8 жастағы баланы ұрып-соққан
Балқаш тұрғыны Мәдина Досымбекова ұлын «Қазақмыс корпорациясы» қызметкері аяусыз ұрып-соққанын мәлімдеді.
«8 жастағы ұлымды аяусыз ұрып-соқты. Бұл жай ғана ұрып-соғу емес, азаптау: саусақтарын сындырып, басынан ұрған, денесін күйдірген. Мұның бәрін ересек ер адам – Балқаш қаласындағы «Қазақмыс» АҚ қызметкері Алмас Басымбеков істеді», – деп жазды әйел әлеуметтік желіде.
Әйел оқиғаның қалай болғанын жазбаған, алайда баланың денесіндегі жарақаттың фотосын жариялаған.
«Қазақмыс корпорациясы» ЖШС хабарлауынша, Досымбекова басшылығына жүгінген, компанияның болған жайттан хабары бар.
«Қолда бар мәліметке сәйкес, жәбірленуші тарап құқық қорғау органдарына арыз түсірген. Өз тарапымыздан тергеуге жан-жақты көмек көрсетеміз. Қызметкерге қатысты барлық шешім ресми тергеу мен оның әрекеттеріне құқықтық баға берілген соң қабылданады», – делінген компания жауабында.
Сондай-ақ компания адам құқығы, заң талабы және ішкі еңбек тәртібін қатаң сақтау қағидаларын ұстанатынын айтты.
«Қызметкердің кінәсі дәлелденсе, ол Қазақстан Республикасының заңына сәйкес жауапқа тартылады», – деді «Қазақмыс» өкілдері.
Полиция мәліметінше, Балқашта кәмелетке толмаған баланы ұрып-соғу фактісі бойынша сотқа дейінгі тергеу жүргізіліп жатыр. Күдікті ұсталып, полиция бөліміне жеткізілген.
«Қылмыстық іс аясында болған оқиғаның толық анықтауға үшін тергеу және процессуалдық іс-әрекеттер жүргізіліп жатыр. Тараптардың уәждері тексеріледі. Кінәлілер заң аясында толық жауапкершілікке тартылады», – деді Қарағанды облысы полиция департаменті.
Тергеу мүддесіне сай басқа ақпарат жарияланбайды.
