Берденов қызметінен кете ме – Шымкент әкімінің орынбасары жауап берді

Шымкент әкімінің орынбасары Сәрсен Құранбек журналистердің «қала әкімінің орынбасары Руслан Берденов орнында қала ма? Әлде қызметтен кету жоспары бар ма?» деген сұраққа жауап берді.

«…Кадрлық ауыс-түйіс үнемі болады. Тек оның деңгейі жоғарғы, орта, төмен деңгейде болуы мүмкін. Бұл қалыпты жағдай. Бұған қатысты мемлекет тарапынан бекітілген арнайы талаптар бар. Бір орында 4 жыл жұмыс істеуі керек. 4 жылдан кейін нақты бір уақытқа бекітілуі керек немесе жұмыс орнын ауыстыруы керек», – деді Құранбек.

Ол бұл сұраққа нақты жауап бере алмайтынын жеткізді.

«Бұл туралы нақты айта алмаймын. Шешім менің деңгейімде емес, жоғарғы деңгейде қабылданады», – деді Сәрсен Құранбек.

Айта кетейік, 2025 жылдың 6 тамызында Шымкентте Руслан Берденовке оқ атқан Ернар Жиембайдың ісі бойынша басты сот талқылауы басталды. Жиембай бұл жағдайға жұмыстың қатысы жоқ екенін, қызғаныштан болғанын айтты.

Сондай-ақ Берденовті өлтіру ойы болмағанын жеткізді. Берденов өзіне оқ атқан Ернар Жиембайдың соттағы жауабына қатысты пікір білдірді.

Ернар Жиембайдың ісі сотқа қылмыстық кодекстің «Адам өлтіру» (99-баптың 1-бөлігі) бабы және «Қылмысқа дайындалу және қылмысқа оқталу» бабымен (24-баптың 3-бөлігі) түскен.