Әкімдік Алматы Дженнифер Лопестің концертін өткізуге дайын екенін хабарлады

Алматы әкімдігі әлемдік поп-жұлдыз Дженнифер Лопестің 10 тамыз күні болатын концертін жоғары деңгейде өткізу үшін Орталық стадионды дайындап жатқанын хабарлады. Дайындық аясында қауіпсіздік шаралары күшейтіліп, инфрақұрылым толық жаңғыртылған. Трибуналар жөнделіп, баспалдақтар жаңартылып, орындықтар ішінара жөнделіп жатқаны айтылды.

Стадион аумағында жүріп жатқан кішігірім құрылыс және жөндеу жұмыстары 9 тамызға дейін толық аяқталады деп сендіреді әкімдік. Бұған дейін стадионның жарық жүйесі жаңартылып, 50-ден астам шам ауыстырылған.

Қазіргі таңда сахнаның техникалық жабдықталуы мен қауіпсіздік талаптарына сәйкестігі тексеріліп жатқаны, сыртқы дәретханалар жаңартылып, қоршаулар қалпына келтірілгені хабарланды.

«Бұл концерт Алматы үшін аса маңызды оқиға. Оның қалай өтетіні қаланың халықаралық беделіне тікелей әсер етеді, сондықтан ұсақ-түйек жайттарды да ескеру қажет. Мұндай шаралар Алматыға деген қызығушылықты арттырып, туристерді тарту үшін маңызды», – деді Алматы қаласы әкімінің орынбасары Азамат Қалдыбеков.

Концерт кезінде қоғамдық қауіпсіздікті қамтамасыз ету үшін 2960 қызметкер жұмылдырылмақ. Оның ішінде 2240 полиция қызметкері, 600 әскери қызметкер, 120 жеке күзет агенттігі өкілдері және 300 ерікті бар.

Кешке келетін қонақтардың қауіпсіздігін қамтамасыз ету мақсатында стадионға кіретін 26 бақылау бекетінің әрқайсысында металл детекторлар мен 52 қол сканерлері орнатылады.

Стадион аумағы төрт негізгі фан-аймаққа бөлінеді, әрқайсысы 2–3 мың адамға арналған. Бұл көрермендердің қозғалысын бақылау мен тәртіп сақтауға мүмкіндік бермек.

«Қала әкімдігі тарапынан санитарлық талап да басты назарда. Стадион жанына қосымша 100-ге жуық биодәретхана қойылады. «Таза Қазақстан» акциясы аясында еріктілер тазалық жұмыстарын жүргізіп, іс-шара барысында тазалықты қамтамасыз етеді.

Стадион аумағында жедел жәрдем және өрт сөндіру көліктері кезекшілік етеді. Барлық төтенше қызмет толық сақадай-сай дайын: эвакуация жоспарлары мен хабарландыру жүйесі тексерілген», – делінген хабарламада.

Арнайы бағыттар бойынша 50 автобус жұмыс істемек. Көлік қозғалысы Абай, Сәтбаев және Байтұрсынов көшелері бойымен белгіленеді. Бағыт табуға навигациялық белгілер мен LED экрандар көмектеседі.

Бұған дейін, Дженнифер Лопестің концерті алдында отандық жас әртіс SADRADDIN өнер көрсететінін жазғанбыз.