Алматыда бүгін 10 тамыз күні әлемдік поп-жұлдыз Дженнифер Лопес концерті өтеді. Концертке санаулы сағаттар қалғанда Орталық стадион маңында мерекелік атмосфера орнады.
Қала нышаны — қар барыстары көрермендерді жылы жүзбен қарсы алып, суретке түсіп, шаттық сыйлап жатыр. Стадион алдындағы алаң түрлі түске боялып, әр қонақ өзін үлкен мерекенің бір бөлшегіндей сезінді.
Көрермендер арасында әртүрлі қала мен елдерден келген адамдар бар. Кейбірі естелікке суретке түссе, енді біреулері өнерпаздардың импровизацияланған қойылымдарына би билеп, балалар маскоттарды қуана құшақтап жүр.
Дженнифер Лопестің Алматыдағы концерті — оның Up All Night атты әлемдік турының бір бөлігі. Бұл шоу қазақстандық жанкүйерлердің сұрауы бойынша тур кестесіне қосылған. Кешке АҚШ, Германия, БАӘ, ТМД және басқа да елдерден қонақтар жиналып жатыр.
Ұйымдастырушылардың айтуынша, Орталық стадионға 20 мыңнан астам көрермен келеді. Сондай-ақ, концертте Sadraddin өнер көрсетеді.
