
Президент Қасым-Жомарт Тоқаев өзінің Қырғызстанға сапары барысында қырғыз президенті Садыр Жапаровпен келіссөз жүргізді. Бұл туралы Ақорда хабарлады.
Тоқаев кездесу барысында өз сөзін екі елдің ежелден келе жатқан бауырластығы мен мен ынтымақтастығынан бастады.
«Бұл сапар екі ел арасындағы достық қатынастың дамуына тың серпін береді деп сенемін. Шын мәнінде, қазақ пен қырғыз – тілектес, бауырлас елдер. Біздің тарихымыз – тамырлас, салт-дәстүріміз бен таным-түсінігіміз, ұлттық болмысымыз ұқсас. Қос халықтың татулығы мен өзара құрметі ешқашан үзілген емес. Қазір де ықпалдастығымыз стратегиялық серіктестік рухында қарқынды дамуда. Біз барлық деңгейде өзара құрметке негізделген саяси диалог орнаттық. Мемлекетаралық, парламентаралық және үкіметаралық кеңестеріміз табысты жұмыс істеп келеді. Сондай-ақ өңіраралық байланыстарды дамытып жатырмыз. Жалпы, екі елдің арасында жан-жақты әрі тығыз ынтымақтастық орнаған», – деді президент.
Сонымен бірге Қырғызстан президентінің ел экономикасын дамытудағы еңбегін де ескеріп өтті.
«Қажырлы еңбегіңіздің арқасында Қырғызстанда көптеген оң өзгеріс болып жатыр. Сіз халықтың әл-ауқатын жақсартуды көздейтін маңызды бастамаларды жүзеге асырып келесіз. Ел экономикасының жыл басынан бері 11,7 пайызға өсуі – осының айқын дәлелі. Біз бауырлас елдің барлық жетістіктеріне қуанамыз. Қырғызстанмен арадағы ынтымақтастықты барынша нығайтуға айрықша мән береміз», – деді ол.
Өз кезегінде Жапаров Қырғыз еліне ресми сапармен келгені үшін Тоқаевқа алғысын білдіріп, екі ел арасындағы достықты нығайтуда бірлесіп жұмыс атқаруға дайын екенін жеткізді.
«Сізді Қырғызстанда көрнекті мемлекет қайраткері және халықаралық деңгейдегі тәжірибелі дипломат ретінде біледі. Соңғы жылдары Сіздің қолдауыңызбен екі елдің қарым-қатынасы жаңа деңгейге өтіп, достығымыз бен бауырластығымыздың бекемделе түсуі бізді қуантады. Қазақ елі – біз үшін ерекше ел. Біздің мәмілелеріміз Тоқтоғұл мен Абайдай, Шыңғыс пен Мұхтардай аталарымыз салған ізбенен жалғасқан. Тарихи мұрамызды ұмытпай, келешек буынға жеткізуді негізгі мақсатымыз деп есептеймін. Өз тарапымнан өзара қарым-қатынасымызды одан әрі ілгерілетуге дайынмын. Біздің негізгі күшіміз – екі елдің ынтымағы мен бірлігі», – деді Қырғызстан президенті.
Ал келіссөз барысында екі елдің президенттері саяси, көлік-транзит, аграрлық және цифрландыру салаларын, сондай-ақ қазіргі таңда өзекті болып отырған су мәселесін талқыға салған.
Еске сала кетсек, президент Қасым-Жомарт Тоқаев Қырғызстанға ресми сапармен барған болатын. Көрші елде Қазақстан мен Қырғызстанның Жоғары мемлекетаралық кеңесінің жетінші отырысы өтеді.