Google жаңа Pixel смартфонын таныстырды
Америкалық Google компаниясы (Alphabet Inc. құрамына кіреді) жыл сайынғы Made by Google шарасында жаңа смартфондары мен басқа да гаджеттерін таныстырды. Бұл жайлы Reuters жазады.
Бұл жолы Google дәстүрлі форматтан шығып, техникалық сипаттамаларға емес, өнімдердің тұтынушыларға тартымдылығына басымдық берді. Құрылғылардың өзі өткен жылмен салыстырғанда айтарлықтай өзгермегенімен, компания әмбебап жасанды интеллект көмекшісін дамытудағы ілгерілеуді атап өтті.
Pixel 10 сериясындағы жаңа ЖИ-функциялар қатарында:
- камера қосымшасындағы көмекші (сапалы сурет түсіруге көмектеседі);
- пайдаланушы сұрамай-ақ өзекті ақпаратты көрсету мүмкіндігі (мысалы, әуе компаниясына қоңырау шалғанда билет сатып алғаныңызды растайтын электронды хатты көрсету);
- қоңырауларды нақты уақыт режимінде аудару.
Смартфондардың сыртқы пішіні айтарлықтай өзгермеген, тек базалық модельге қымбат нұсқалардағыдай телеобъектив қосылды.
Бағасы:
- Pixel 10 – 799 доллардан басталады;
- Pixel 10 Pro Fold (жинамалы) – 1 799 доллар.
Pixel 10, Pixel 10 Pro, Pixel 10 Pro XL смартфондары тамызда, ал Pixel 10 Pro Fold қазанда сатылымға шығады деген жоспар бар. Барлық смартфондар жаңа Google Tensor G5 процессорымен жабдықталған. Сондай-ақ алғаш рет магнитті сымсыз қуаттау функциясы енгізілді. Ол Pixelsnap деп аталады және iPhone-дағы MagSafe-ке ұқсас.
Сонымен қатар Google Pixel Watch 4 смарт-сағаттарын және Pixel Buds 2a сымсыз құлаққаптарын таныстырды.
