«Қайрат» футбол клубы EA Sports FC 26 ойынында пайда болады
Алматылық «Қайраттың» Чемпиондар лигасына жолдама алуы тек Қазақстан футболының тарихындағы үлкен жетістік қана емес, сонымен бірге әлемдік футбол жанкүйерлерін қуантатын ерекше жаңалыққа себеп болды. EA Sports компаниясы жақында таныстырған EA Sports FC 26 ойынында «Қайрат» клубы пайда болады.
EA FC 26 ойыны жанкүйерлер үшін үлкен жаңалықтарға толы. Жаңа нұсқада дриблинг механикасы түбегейлі өзгеріп, ойыншылардың алаңдағы орналасуы жасанды интеллект арқылы әлдеқайда ақылдырақ болмақ. Қақпашылардың анимациясы да шынайы ойынға барынша жақындайды.
Ойын екі түрлі режимді ұсынады:
- Competitive — қарқынды әрекет пен ақылды AI-ға негізделген, Ultimate Team және Clubs режиміне арналған;
- Authentic — нағыз футболға тән тактика мен мінез-құлықты қамтитын, Career Mode үшін жасалған.
EA FC 26 ойынында 20 мыңнан астам лицензияланған ойыншы, 750-ден аса клуб пен ұлттық құрамалар, 35-тен астам лига бар. Олардың қатарында УЕФА турнирлері (Чемпиондар лигасы, Еуропа лигасы, Конференция лигасы), Копа Либертадорес, Копа Судамерикана, сондай-ақ Ағылшын Премьер-лигасы, Бундеслига, Ла Лига, Лига 1, Серия А сияқты үздік чемпионаттар бар.
Аталған тізімге тұңғыш рет Қазақстаннан «Қайрат» клубы қосылады. Бұл команданың Чемпиондар лигасының негізгі кезеңіне жолдама алуы — виртуалды футбол әлемінде де өз орнын табуына мүмкіндік берді. Енді жанкүйерлер сүйікті клубын EA FC 26-да басқаруға және әлемдік грандтарға қарсы сынап көруге мүмкіндік алады.
Бұл жаңалық — Қазақстан футболының халықаралық деңгейде танылып келе жатқанының айқын дәлелі. Алматылық клуб енді тек жасыл алаңда ғана емес, әлемнің миллиондаған ойыншылары ойнайтын виртуалды кеңістікте де танылады.
Еске сала кетейік, 26 тамызда «Қайрат» клубы «Селтик» командасын пенальтиде жеңді. Осылайша, алматылық клуб тарихта алғаш рет Чемпиондар лигасының жалпы кезеңіне өтті.
