28 тамыз күні Шымкент қаласы Желтоқсан көшесінің бойында орналасқан қалалық полиция департаментінің маңында әйел адамды көлік қағып кетті. Әйел оқиға орнында қайтыс болған.
Қалалық полиция департаментінің дерегінше, әйелді соққан көлікті полиция қызметкері жүргізген. Бейресми мәліметке қарағанда, ол Абай аудандық полиция бөлімінде жедел уәкіл болып жұмыс істейді. Оқиғаға қатысты қылмыстық іс қозғалған.
«Әйел адам ағаштардың арасынан кенеттен жүгіріп шығып, белгіленбеген жерден жолды кесіп өтпек болған. Алдын ала мәліметтерге сәйкес, жүргізуші тарапынан жол қозғалысы ережелерін бұзу анықталмады: ол масаң күйде болмаған және жылдамдық режимін сақтаған», – делінген полиция хабарламасында.
Департамент кешенді тергеу іс-шаралары басталғанын мәлімдеді. Оның қорытындысы бойынша процессуалдық шешім қабылданатын болады.
