Астанада екі ай бойы демалыс күндері жәрмеңке өтеді

Астанада қазанның соңына дейін әр демалыста ауыл шаруашылығы жәрмеңкесі өтеді. Бұл туралы қала әкімдігі хабарлады.

«Еліміздің түрлі өңірінен келген тауар өндірушілердің қатысуымен ауылшаруашылығы өнімдерінің жәрмеңкесі басталады. Олар 26 қазанға дейін әр сенбі және жексенбіде өткізіледі», – делінген ақпаратта.

Осылайша алғашқы болып Түркістан облысы тауар өндірушілері өнімдері сатылады. Жәрмеңке 30 және 31 тамызда өтеді.

Қала тұрғындары жәрмеңкеде ет, балық, сүт өнімдері, бакалея, сондай-ақ көкөніс пен жеміс-жидектің алуан түрін сатып ала алады.

Түркістан облысының ауылшаруашылық тауар өндірушілері Астанаға 600 тоннадан астам өнім әкеледі. Оның ішінде: 200 тонна көкөніс, 100 тонна ет пен ет өнімдері, 100 тонна сүт өнімдері, 80 тонна бақша өнімдері, 50 тонна жеміс, 19 тонна балық, 12 мың дана жұмыртқа және 60 тоннадан астам басқа да азық-түлік өнімдері бар.

Жәрмеңке барысында концерт те ұйымдастырылады. Ауылшаруашылық жәрмеңкесі «Қазанат» ипподромының автотұрағы аумағында (Қарқаралы тасжолы, 1) өтеді. Сондай-ақ жәрмеңке өтіп жатқан күндері қала тұрғындары мен қонақтарының жылдам жетуі үшін №18, №37 және №303 автобустар қатынайды.

Жәрмеңке сағат 9:00-ден 18:00-ге дейін жұмыс істейді.