Bek Air сотына бір маман бес саланың сарапшысы ретінде шақырылды – адвокат
Алматыда Bek Air Fokker-100 ұшағы апатынан кейін қайтыс болғандардың ісі бойынша сот процесі өтіп жатыр. Апат 2019 жылдың 27 желтоқсанында болған. Салдарынан 12 адам қаза тапты.
Қылмыстық іс ұшақты басқарған екі ұшқыш Марат Мұратбаев пен Мейіржан Молдақұловқа қатысты қозғалған. Бір ұшқыш апат кезінде қайтыс болған, екіншісі апаттан кейін қаза тапты.
Жәбірленушінің адвокаты Сергей Державец KursivMedia тілшісіне іске қатысты назар аудару қажет ақпаратты бөлісті. Оның сөзінше, 2025 жылдың 27 тамызындағы сотқа сарапшылар қатысқан. Оның ішінде сарапшы Исин бес бағыт бойынша қорытынды жасаған.
«Бұл істе кешенді сараптама тағайындалған, ол метеорологиядан бастап, ұшу ережелеріне дейін қамтиды. Яғни, бұл жерде арнайы ғылыми білімнің қатысы жоқ. Оның үстіне, метеорология математика, физика сияқты нақты ғылым емес. Яғни, болжам жасауға болады, бірақ нақты қорытынды шығара алмайды», – дейді Державец.
Айтуынша, сот отырысында сарапшы Исин бес бағыт бойынша ақпарат берген.
«Исин метеорология, ұшуды ұйымдастыру ережелері, әуе кемесін ұшуға дейінгі дайындау, қыс мезгілінде әуе кемелерін мұздан тазалау шаралары, сондай-ақ әуе кемесін пайдалану бойынша ақпарат берді. Алайда ол ұшқыш ретінде бір күн де жұмыс істемеген және авиациялық оқу орнын тәмамдамаған», – дейді ол.
Маманның сөзінше, қылмыстық іс материалдарында әуежай метеоқызметі тергеу органдарына арнап жасаған анықтама бар. Құжатта әуежайдағы әуе кемелерінде қар-мұз қалдықтарының болған-болмағаны жөнінде нақты қорытынды жасау мүмкін еместігі көрсетілген. Себебі арнайы өлшеу құралдарымен тиісті зерттеулер жүргізілмеген. Яғни, метеоқызмет ұшақ міндетті түрде мұзға қарсы өңделуге тиіс еді деп кесіп айтуға деректер жеткіліксіз екенін мәлімдеген.
«Тергеу тарабы экипаж ұшақ қанаттарын мұзға қарсы сұйықтықпен өңдемеген, соның салдарынан апат болды дегенді алға тартып отыр. Айыптау толықтай осы дерекке негізделген: экипаж салғырттық танытты, өз міндеттерін тиісті деңгейде атқармады, қанаттарда мұз бар-жоғын тексерместен әуе кемесін өңдеусіз ұшуға жіберді. Соның салдарынан апат болып, адамдар қаза тапты деп отыр», – дейді адвокат.
Ал сотқа сарапшы ретінде қатысқан Исиннің қорытындысы метеоқызмет қорытындысынан өзгеше болып шыққан. Сарапшы сол кездегі ауа райы әуежайдағы барлық ұшаққа міндетті түрде мұзға қарсы сұйықтық қолдану қажет болған деп мәлімдеген.
Bek Air ұшағы апатқа ұшырады
2019 жылдың 27 желтоқсанында Алматыдан елордаға шыққан ұшақ таңғы 07:22 кезінде екі қабатты құрылыс нысанымен соқтығысқан. Әуе апаты салдарынан 12 адам қаза тауып, 49 адам зардап шеккен. Ұшақ бортында 93 жолаушы мен экипаждың 5 мүшесі болған. Қаза болғандардың ішінде ұшақ командирі Марат Мұратбаев та бар.
Екінші ұшқыш Мейіржан Молдақұлов ауруханаға түсті. Алайда бір айға жуық уақыттан кейін ұшқыш үйінде қайтыс болды.
Марқұм екі ұшқышқа Қылмыстық кодекстің 344-бабы 3-бөлігінде көрсетілген қылмыстық құқық бұзушылықты жасады деген айып тағылған. Бұл бапта әуе көлігі жүрісі немесе оларды пайдалану қауіпсіздігі қағидаларын бұзу екі немесе одан да көп адамның өліміне әкеп соққан жағдай көрсетілген.
